డీసీసీబీ చైర్మన్‌గిరీ ఎవరికి?
రైతు సహకార సేవా సంఘాల పోరులో టీఆర్ఎస్ మద్దతుదారులు హవా కొనసాగించారు. ఉమ్మడి రంగారెడ్డి జిల్లాలోని 57 సొసైటీల్లో టీఆర్ఎస్- 49, కాంగ్రెస్- 7, స్వతంత్రులు ఒకటి చొప్పున చైర్మన్ పదవులను కైవసం చేసుకున్నారు. ఇక మిగిలింది డీసీసీబీ చైర్మన్ఎన్నికే. ఆరుగురు అభ్యర్థులు డీసీసీబీ చైర్మన్ పదవికి పోటీపడుతుండగా వీరిలో రియల్వ్యాపారి రేసులో ముందున్నట్లు సమాచారం. అయితే ఇంకా నోటిఫికేషన్ వెలువడకపోవడంతో ఆశావహులు మంత్రి సబితాఇంద్రారెడ్డి, ఎమ్మెల్సీ మహేందర్రెడ్డి, ఎంపీ రంజిత్రెడ్డిలను ప్రసన్నం చేసుకునే పనిలో పడ్డారు. పైగా చైర్మన్రేసులో ఉన్నవారిలో ఐదుగురు రెడ్డి సామాజిక వర్గానికి చెందినవారే కావడం గమనార్హం. ఏదేమైనా, చైర్మన్ ఎన్నిక ఏకగ్రీవంగానే ఉండాలంటూ టీఆర్ఎస్ వర్కింగ్ ప్రెసిడెంట్ కేటీఆర్ ఇప్పటికే పార్టీ నాయకులను ఆదేశించినట్లు సమాచారం.
ఉమ్మడి జిల్లా ప్రాతిపదికనే ఎన్నిక..
పాత జిల్లా ప్రాతిపదికనే డీసీసీబీ చైర్మన్ ఎన్నిక జరగనుంది. మొదటగా కొత్త జిల్లాల ప్రాతిపాదికన డీసీసీబీ ఎన్నిక నిర్వహించాలని అభిప్రాయపడ్డినా, చివరి క్షణంలో రాష్ట్ర ప్రభుత్వం నిర్ణయం మార్చుకొని పాత జిల్లాలోని సొసైటీ ప్రకారం ఎన్నికలు నిర్వహించారు. పాత జిల్లా ప్రకారం రంగారెడ్డిలో 28, వికారాబాద్లో 20, మేడ్చల్లో 9 సొసైటీల చొప్పున ఉన్నాయి. కొత్త జిల్లాల ప్రకారం రంగారెడ్డిలో 37, వికారాబాద్లో 22, మేడ్చల్9 సొసైటీలున్నాయి. అంటే ఉమ్మడి రంగారెడ్డి జిల్లాలో ఉన్నన్ని సొసైటీలే ఉన్నాయి.
ఐతే చైర్మన్.. లేకుంటే వైస్ చైర్మన్..
డీసీసీబీ చైర్మన్ పదవి దక్కకుంటే వైస్ చైర్మన్ పదవినైనా దక్కించుకోవాలని ఆశావహులు పోటీ పడుతున్నారు. కుల్కచర్ల పీఏసీఎస్ చైర్మన్‌గా ఎన్నికైన మనోహర్ రెడ్డి, బండ్లగూడ ఖల్సా పీఏసీఎస్ చైర్మన్‌గా పెంటారెడ్డి, పెద్దేముల్‌ మండలం ఘట్టేపల్లి పీఏసీఎస్ చైర్మన్‌గా ఎన్నికైన లక్ష్మారెడ్డిలతోపాటు ఆలూర్, చేవెళ్ల, శంషాబాద్ పీఏసీఎస్ చైర్మన్ పదవులను దక్కించుకున్నకృష్ణారెడ్డి, పోలీస్ రాంరెడ్డి, బుర్కంట సతీష్‌లు కూడా ఇందుకోసం గట్టి ప్రయత్నాలు చేస్తున్నారు. మరో రెండు రోజుల్లో డీసీసీబీ చైర్మన్ఎన్నికకు నోటిఫికేషన్ వెలువడే అవకాశాలుండటంతో డీసీసీబీ అధికారులు అన్ని ఏర్పాట్లు పూర్తిచేసే పనిలో పడ్డారు.
