దారుణం...విద్యార్థి దారుణ హత్య

దిశ, బడంగ్​పేట్​ : సంచలనం సృష్టించిన రౌడీషీటర్​ రియాజ్​ హత్య కేసు మరవకముందే బీఈ సివిల్స్​ ద్వితీయ సంవత్సరం విద్యార్థి దారుణ హత్యకు గురైన సంఘటన బాలాపూర్​ పోలీస్​ స్టేషన్​ పరిధిలో గురువారం సాయంత్రం తీవ్ర కలకలం రేపింది. మంది @ 37 అరేబియన్​ బిర్యాని సెంటర్​ గేట్​ ఆవరణలో ఉన్న పాన్​ షాప్​లో సిగరెట్​ తాగడానికి వెంట వచ్చిన ముగ్గురిలో ఒకరు కత్తితో బీఈ సివిల్స్​ ద్వితీయ సంవత్సరం విద్యార్థిపై కత్తితో విచక్షణారహితంగా దాడిచేసి పరారయ్యాడు. బాలాపూర్​ పోలీసులు తెలిపిన వివరాల ప్రకారం ... బాలాపూర్​ గణేష్​ చౌక్​ వద్ద మంది @ 37 అరేబియన్​ బిర్యాని సెంటర్​ గేట్​ ఆవరణలోని ఓ పాన్​ షాప్​కి గురువారం సాయంత్రం నలుగురు స్నేహితులు సిగరెట్​ కోసం వచ్చారు.

అక్కడ సిగరెట్లు కొనుగోలు చేశారు. సిగరెట్​ తాగుతుండగా 21 సంవత్సరాల యువకుడికి వెంట వచ్చిన మరో ముగ్గురిలో ఒకరితో గొడవ జరిగింది. వెంటనే కత్తితో సదరు యువకుడిని అందరూ చూస్తుండగానే అతి కిరాతకంగా హత్య చేశాడు. అతను మృతి చెందగానే మరో ముగ్గురు స్నేహితులు అక్కడి నుంచి ఓ బైక్ పై పరారయ్యారు. అరేబియన్​ బిర్యాని సెంటర్​ నిర్వాహకుల ద్వారా సమాచారం అందుకున్న మహేశ్వరం డీసీపీ సునీతా రెడ్డి, అడిషనల్​ డీసీపీ సత్యానారాయణ, ఏసీపీ లక్ష్మీకాంత్​ రెడ్డి, బాలాపూర్​ ఇన్​స్పెక్టర్​ భూపతి బృందం వెంటనే ఘటనా స్థలికి చేరుకున్నారు. మృతుని కాలేజీ బ్యాగ్​ లో లభించిన హాల్​ టికెట్​, ఓటర్​ కార్డు ఆధారంగా మృతుడు ఖమ్మం జిల్లా అయ్యవారి గూడెం ప్రాంతానికి చెందిన

టి.అనిత, మోండ్రు శాంతయ్యల కుమారుడు మోండ్రు ప్రశాంత్​ (21)గా పోలీసులు గుర్తించారు. హత్యకు గురైన ప్రశాంత్, అతని తల్లి అనితతో కలిసి గత కొంత కాలంగా బాలాపూర్​లో నివాసముంటున్నట్లు పోలీసులు గుర్తించారు. అంతేగాకుండా ప్రశాంత్​ నాదర్​గూల్​లోని ఎంవీఎస్సార్​ ఇంజనీరింగ్​ కళాశాలలో బీఈ సివిల్స్​ ద్వితీయ సంవత్సరం చదివేవాడు. అతని మృతదేహాన్ని పోస్టు మార్టం నిమిత్తం ఉస్మానియా మార్చురీకి తరలించారు. ఇంతకు ప్రశాంత్​ వెంట వచ్చిన ఆ ముగ్గురు స్నేహితులేనా ? కాదా? వారి మధ్య పాత కక్షలు ఏమైనా ఉన్నాయా? ఇతర కారణాలు ఉన్నాయా? అనే కోణాల్లో బాలాపూర్​ పోలీసులు దర్యాప్తు చేస్తున్నారు. ఘటన స్థలంలోని సీసీ కెమెరాలను పోలీసులు పరిశీలిస్తున్నారు. ఇంకా పూర్తి వివరాలు తెలియాల్సి ఉంది.