తేనెటీగల దాడిలో గొర్రెల కాపరి మృతి..

దిశ, జగదేవ్ పూర్: తేనెటీగల దాడిలో గొర్రెల కాపరి మృతి చెందిన విషాదకరమైన సంఘటన ఆదివారం సిద్ధిపేట జిల్లా జగదేవ్ పూర్ మండల పరిధిలోని చాట్లపల్లి గ్రామంలో జరిగింది. గ్రామస్తుల కథనం ప్రకారం వివరాలిలా ఉన్నాయి. గ్రామానికి చెందిన బోకర్ల బాలయ్య (45) అనే వ్యక్తి గొర్రెల కాపరిగా జీవనం సాగిస్తున్నాడు. ఈ క్రమంలో ఉదయం 10 గంటల సమయంలో ఇంటి వద్ద ఉన్న జీవుల మేత కోసం గ్రామ సమీపంలోని ఓ వ్యవసాయ బావి వద్దకు వెళ్లి ఒక చెట్టుకు కొమ్మలు తెంపుతుండగా అకస్మాత్తుగా ఆ చెట్టుకు ఉన్న తేనెటీగల గుంపు బాలయ్యను చుట్టుముట్టాయి. దీంతో బాలయ్య గ్రామంలోకి పరుగులు పెట్టి ఒక ఇంటిలోకి దూరినప్పటికీ తేనెటీగలు వదిలిపెట్టకుండా కరవడంతో పలువురు గ్రామస్తులు గడ్డితో మంటలు పెట్టి పొగ ద్వారా తేనెటీగలు వెళ్లిపోయేలా చేశారు. కాగా అప్పటికే అపస్మారక స్థితిలోకి వెళ్లిన బాలయ్యను కుటుంబ సభ్యులు చికిత్స నిమిత్తం వంటిమామిడిలోని ఆర్ వీఎం ఆసుపత్రికి తరలించగా అప్పటికే మృతి చెందినట్లు గ్రామస్థులు తెలిపారు. మృతునికి భార్య, ఒక కుమారుడు, కూతురు ఉన్నారు.