సుమారు 27 కేజీల గంజాయి పట్టివేత
దిశ,దుమ్ముగూడెం : గంజాయిని రవాణా చేస్తున్న నిందితులను పోలీసులు పట్టుకున్నారు. దుమ్ముగూడెం మండల పరిధిలోని మహాదేవపురం శివారులో శనివారం ఎస్సై వెంకటప్పయ్య తన సిబ్బందితో కలిసి వాహన తనిఖీ నిర్వహించారు. ఈ సందర్భంగా ట్రాలీ ఆటోలో తరలిస్తున్న గంజాయి బాక్సులు పట్టుబడ్డాయి. దాదాపు 26.81 కేజీల గంజాయిని స్వాధీనం చేసుకున్నారు.
గంజాయి తరలిస్తున్న ఇద్దరిని పోలీసులు అరెస్టు చేశారు. నిందితులు కోడి రాంబాబు, యనమలగండ్ల సాంబయ్య ఆంధ్రాలోని చింతూరు మండలానికి చెందిన వారిగా పోలీసులు తెలిపారు. కానీ వీరిద్దరి స్థిర నివాసం అశ్వాపురం గ్రామంగా గుర్తించారు. అంతే కాకుండా గంజాయిని మరికొందరితో కలిసి ఆంధ్ర –ఒడిస్సా సరిహద్దు ప్రాంతం నుంచి కొనుగోలు చేసి తెలంగాణకు రహస్యంగా సరఫరా చేస్తున్నట్లు పేర్కొన్నారు. వారి వద్ద నుండి ట్రాలీ ఆటో, రూ.6100 నగదును,రెండు సెల్ ఫోన్లను స్వాధీనం చేసుకున్నారు.
