Kannappa teaser: ‘కన్నప్ప’ సినిమాను నేను రెండుసార్లు రిజెక్ట్ చేశా.. స్టార్ హీరో వైరల్ కామెంట్స్
దిశ, సినిమా: మంచు విష్ణు (Vishnu Manchu) డ్రీమ్ ప్రాజెక్ట్‌గా తెరకెక్కుతోన్న చిత్రం ‘కన్నప్ప’ (Kannappa). ఈ సినిమాకు సంబంధించిన టీజర్ (Teaser)ను ముంబై (Mumbai)లో జరిగిన ప్రత్యేక మీడియా ఈవెంట్‌లో ఆవిష్కరించారు. బాలీవుడ్ (Bollywood) సూపర్ స్టార్ అక్షయ్ కుమార్ (Akshay Kumar), నటుడు విష్ణు మంచు, దర్శకుడు ముఖేష్ కుమార్ సింగ్ ఈ కార్యక్రమంలో సందడి చేశారు. గ్రాండ్‌గా జరిగిన ఈ ఈవెంట్‌లో ప్రత్యేకంగా ప్రదర్శించిన ‘కన్నప్ప’ టీజర్ అందరినీ ఆకట్టుకుంది. ఈ సందర్భంగా శివుడి పాత్రలో నటించిన అక్షయ్ కుమార్ (Akshay Kumar) మాట్లాడుతూ.. ‘మొదటగా ‘కన్నప్ప’ ఆఫర్ నాకు వచ్చినప్పుడు రెండు సార్లు తిరస్కరించాను. కానీ భారతీయ సినిమా ప్రపంచంలో శివుడిగా నేను బాగుంటాను అని విష్ణు పెట్టుకున్న నమ్మకమే నన్ను ఈ సినిమా ఒప్పుకునేలా చేసింది. కన్నప్ప కథ చాలా శక్తివంతమైంది. ఎంతో లోతైన ఎమోషన్స్ ఉంటాయి. విజువల్ వండర్‌గా ఉండబోతోంది. ఈ అద్భుతమైన ప్రయాణంలో భాగమైనందుకు నేను గౌరవంగా భావిస్తున్నాను’ అని అన్నారు.
విష్ణు మంచు మాట్లాడుతూ.. ‘కన్నప్ప కేవలం నాకు ఓ ప్రాజెక్ట్.. ఓ సినిమా కాదు.. ఇది నా జీవిత ప్రయాణం. నేను ప్రస్తుతం భారతదేశంలోని అన్ని జ్యోతిర్లింగాలను సందర్శిస్తున్నాను. కన్నప్ప కథతో నాకు ఆధ్యాత్మిక బంధం ఏర్పడింది. ఇది అచంచలమైన విశ్వాసం, త్యాగానికి సంబంధించిన కథ. ఈ ప్రయాణంలో అక్షయ్ కుమార్, మోహన్‌లాల్, ప్రభాస్ వంటి దిగ్గజాలు మాతో చేరడం నాకు చాలా గర్వంగా ఉంది. ఎందుకంటే భక్తి, దైవిక శక్తితో నిండిన ఈ కథ ప్రపంచవ్యాప్తంగా ఉన్న ప్రతి వ్యక్తికి చేరుతుందని మేము నమ్ముతున్నాం. ఇది సరిహద్దులను దాటి మానవాళి హృదయంతో మాట్లాడే చిత్రం కానుంది’ అని అన్నారు.
దర్శకుడు ముఖేష్ కుమార్ సింగ్ (Mukesh Kumar Singh) మాట్లాడుతూ.. ‘అక్షయ్, మోహన్‌లాల్, ప్రభాస్ వంటి దిగ్గజాలను డైరెక్ట్ చేయడం అద్భుతమైన అనుభవం. వారందరూ చాలా సహకరించారు. వారి పాత్రలు తెరపై అద్భుతం చేయబోతోన్నాయి. ఈ చిత్రం పట్ల విష్ణుకున్న ప్యాషన్ గురించి ఎంత చెప్పినా తక్కువే అవుతుంది. ఈ అద్భుతమైన కథ ప్రతిఒక్కరి వద్దకు చేరేలా చూసేందుకు మేము కృషి చేస్తున్నాము’ అని అన్నారు. కాగా.. ఇప్పటికే కేన్స్ ఫిల్మ్ ఫెస్టివల్‌లో దృష్టిని ఆకర్షించిన ఈ కన్నప్ప టీజర్ మార్చి 1న అందరి ముందుకు రాబోతోంది. అలాగే.. ఉత్కంఠభరితమైన విజువల్స్, పురాణ గాథతో కన్నప్ప చిత్రం ఏప్రిల్ 25, 2025న ప్రపంచ వ్యాప్తంగా థియేటర్లలో విడుదల కానుంది.
