ఎఫ్‌డీలపై వడ్డీ రేట్లు పెంచిన యూనియన్ బ్యాంక్

న్యూఢిల్లీ: ప్రభుత్వ రంగ యూనియన్ బ్యాంక్ ఆఫ్ ఇండియా తన ఫిక్స్‌డ్ డిపాజిట్(ఎఫ్‌డీ)లపై వడ్డీ రేట్లను పెంచింది. రూ. 2 కోట్ల కంటే తక్కువ డిపాజిట్లపై 25 బేసిస్ పాయింట్లు పెంచుతూ బ్యాంకు రేట్లను సవరించింది. సవరించిన రేట్లు బుధవారం(డిసెంబర్ 27) నుంచే అమల్లోకి వస్తాయని ఓ ప్రకటనలో తెలిపింది.

తాజా వివరాల ప్రకారం బ్యాంకు 7 రోజుల నుంచి 45 రోజుల కాలపరిమితి కలిగిన డిపాజిట్లపై 3 శాతం వడ్డీ ఇస్తుండగా 46-90 రోజులకు 4.05 శాతం, 91-120 రోజులకు 4.3 శాతం, 120-180 రోజులకు 4.4 శాతం, 181 రోజుల నుంచి ఏడాది కాలానికి 5.25 శాతం, ఏడాది నుంచి 398 రోజులకు 6.75 శాతం, 399 రోజులకు గరిష్ఠంగా 7.25 శాతం, 2 ఏళ్ల నుంచి 10 ఏళ్ల డిపాజిట్లకు 6.5 శాతం వడ్డీ అమలు కానుంది. అన్ని కాల వ్యవధులపై సీనియర్ సిటిజన్లకు అదనంగా 0.50 శాతం ఎక్కువ వడ్డీ లభిస్తుంది. అలాగే, సూపర్ సీనియర్ సిటిజన్లు అదనంగా 0.75 శాతం వడ్డీ పొందుతారు.