Hyundai i20 N Line Highlights : కొత్తగా i20 కారు.. ధర రూ.9.99 లక్షలు

న్యూఢిల్లీ: కార్ల తయారీ దిగ్గజం హ్యూండాయ్ మోటార్స్ ఇండియా తన కొత్త ఐ20 ఎన్-లైన్ ఫేస్‌లిఫ్ట్ మోడల్‌ను భారత మార్కెట్లో విడుదల చేసింది. దీని ధరను రూ. 9.99 లక్షల నుంచి రూ. 12.32 లక్షల మధ్య నిర్ణయించినట్టు కంపెనీ ఓ ప్రకటనలో తెలిపింది. వినియోగదారుల భద్రతను పరిగణలోకి తీసుకుని అందుకవసరమైన కొత్త ఫీచర్లు, డిజైన్, ఇతర సాంకేతిక ఫీచర్లలో మార్పులు చేసినట్లు హ్యూండాయ్ వెల్లడించింది.

సరికొత్త ఐ20 ఎన్-లైన్ టర్బో పెట్రోల్ ఇంజిన్ వేరియంట్‌తో వస్తుంది. దీనికి మూడేళ్లు లేదంటే 1.50 లక్షల కిలోమీటర్ల వారంటీ ఉంటుంది. 6-స్పీడ్ మాన్యువల్ ట్రాన్స్‌మిషన్‌తో ఈ కారులో డిజైన్ మాత్రమే కాకుండా ప్రీమియం హ్యాచ్‌బ్యాక్ వేరియంట్లో కొత్త తరానికి ఇష్టమైన రీతిలో మార్పులు చేసినట్లు కంపెనీ సీఓఓ తరుణ్ గార్గ్ అన్నారు. భద్రతకు సంబంధించి 6-ఎయిర్‌బ్యాగులు, ఎలక్ట్రానిక్ స్టెబిలిటీ కంట్రోల్, స్టెబిలిటీ మేనేజ్‌మెంట్, హిల్ అసిస్ట్ కంట్రోల్, యాంటీలాక్ బ్రేకింగ్ సిస్టమ్ లాంటి ఫీచర్లు ఉన్నాయి. 60 రకాల కనెక్టెడ్ ఫీచర్లు ఈ కారులో అందించామని కంపెనీ పేర్కొంది.