షాకిస్తున్న బంగారం.. వరుసగా మూడోరోజు భారీగా పెరిగిన ధరలు

దిశ, వెబ్ డెస్క్: గతవారం 10 గ్రాముల బంగారం ధర దాదాపు రూ.3000 మేర తగ్గిన బంగారం ధర.. ఈ వారం ఆరంభం నుంచీ వరుసగా పెరుగుతూ.. కొనుగోలు దారులకు షాకిస్తోంది. నవంబర్ 17 (ఆదివారం) 10 గ్రాముల బంగారం ధర 22 క్యారెట్లు రూ.69,350, 24 క్యారెట్లు రూ.75,650 ఉండగా.. ఇప్పుడు 71 వేల రూపాయల నుంచి రూ.77 వేల వరకూ పెరిగింది. దీంతో కొనుగోలు దారులు బంగారాన్ని కొనాలంటే ఆలోచిస్తున్నారు.

బుధవారం ఉదయం 11 గంటలకు బంగారం ధరలు మారాయి. 22 క్యారెట్ల బంగారం 10 గ్రాములపై రూ.500, 24 క్యారెట్ల బంగారం 10 గ్రాములపై రూ.550 మేర ధర పెరిగింది. ప్రస్తుతం హైదరాబాద్ లో 22 క్యారెట్ల 10 గ్రాముల బంగారం ధర రూ.71,150కి చేరగా.. 24 క్యారెట్ల 10 గ్రాముల బంగారం ధర రూ.77,620కి పెరిగింది.

స్థిరంగా వెండి..

బంగారం ధర పెరగ్గా.. వెండి ధర స్థిరంగా ఉంది. నవంబర్ 15 నుంచి 18 వరకూ ఎలాంటి పెరుగుదల లేని వెండికి.. నిన్న రెక్కలొచ్చాయి. ఒకేసారి కేజీ వెండి ధరపై రూ.2000 పెరగడంతో.. మళ్లీ లక్ష మార్కును దాటేసింది. నవంబర్ 14 నుంచి 18 వరకూ రూ.99,000 ఉన్న వెండి ధర నిన్న రూ.1,01,000కు చేరింది. నేడు కూడా అదే ధర కొనసాగుతోంది.