ఫస్ట్ టైం ఓటు వేస్తున్న వారికి ఎయిర్ ఇండియా ఎక్స్‌ప్రెస్ బంపర్ ఆఫర్
దిశ, బిజినెస్ బ్యూరో: 2024 లోక్‌సభ ఎన్నికల నేపథ్యంలో ప్రముఖ విమానయాన సంస్థ ఎయిర్ ఇండియా ఎక్స్‌ప్రెస్ బంపర్ ఆఫర్ ప్రకటించింది. ఓటర్లను ప్రోత్సహించడానికి ఈ ఎన్నికల్లో తొలిసారి ఓటు హక్కును వినియోగించుకునే వారి కోసం తన విమాన చార్జీలపై 19 శాతం తగ్గింపును ప్రకటించింది. దేశీయ, అంతర్జాతీయ సర్వీసులకు ఈ ఆఫర్ అందుబాటులో ఉంటుంది. ఈ రాయితీ పొందాలనుకునే వారు 18 నుంచి 22 ఏళ్ల వయస్సు వారై ఉండాలి. ఓటు వేయబోయే నియోజకవర్గానికి దగ్గరగా ఉన్నటువంటి ఎయిర్‌పోర్ట్‌ను ఎంచుకోవాలి. ఈ ఆఫర్ క్రింద ప్రయాణం చేయాలనుకునే వారు తప్పనిసరిగా గుర్తింపు పత్రాలను చూపించాల్సి ఉంటుంది. టికెట్ బుక్ చేసుకున్న వారు ఏప్రిల్ 18 నుంచి జూన్ 1 మధ్య ప్రయాణించాలి. మొబైల్ యాప్, కంపెనీ వెబ్‌సైట్ ద్వారా బుకింగ్‌ చేసుకోవచ్చు.
ఎక్స్‌ప్రెస్ లైట్, ఎక్స్‌ప్రెస్ వాల్యూ, ఎక్స్‌ప్రెస్ ఫ్లెక్స్, ఎక్స్‌ప్రెస్ బిజ్ అనే నాలుగు కేటగిరీలలో మొదటిసారి ఓటు వేస్తున్న వారు ఈ ఆఫర్‌ను పొందవచ్చని ఎయిర్‌లైన్ తెలిపింది. ఎయిర్ ఇండియా ఎక్స్‌ప్రెస్ చీఫ్ కమర్షియల్ ఆఫీసర్ డాక్టర్ అంకుర్ గార్గ్ మాట్లాడుతూ, ఎయిర్ ఇండియా ఎక్స్‌ప్రెస్ ఎల్లప్పుడూ మార్పులకు అనుగుణంగా పనిచేస్తుంది, సరిహద్దులు దాటి ప్రజలను, ప్రదేశాలను, సంస్కృతులను ఏకం చేస్తుందని అన్నారు.
