విప్లవ కవి వరవరరావుకు బెయిల్ మంజూరు

మావోయిస్ట్‌లతో కలిసి రాజీవ్ గాంధీ తరహాలో ప్రధాని మోడీ హత్యకు కుట్ర చేశారనే అభియోగాలతో విప్లవ కవి వరవరరావును మహారాష్ట్ర పోలీసులు అరెస్ట్ చేసిన విషయం తెలిసిందే.

2018 జనవరిలో మహారాష్ట్రలోని బీమా కోరెగావ్ వద్ద దళిత సైనికులు, బ్రిటీషర్లతో కలిసి పీష్వారాజుల సైన్యంపై పోరాడి విజయం సాధించిన ఘట్టానికి 200 ఏళ్లు పూర్తైన సందర్భంగా ‘ఎల్గార్ పరిషత్’ పేరుతో కొందరు దళిత, వామపక్ష కార్యకర్తలు కార్యక్రమాన్ని నిర్వహించారు. ఆ కార్యక్రమం చివరకి అల్లర్లకు దారితీసింది. ఆ అల్లర్లలో ఒకరు మృతి చెందగా, పోలీసులతో సహా పలువురు గాయపడ్డారు. కేసు నమోదు చేసుకున్న పోలీసులు దర్యాప్తు ప్రారంభించారు. దర్యాప్తులో అల్లర్లకు హక్కుల కార్యకర్తలైన రోనా విల్సన్, సుధీర్ ధావ్లే, సుధీంధ్ర గాండ్లింగ్, ప్రొఫెసర్ షోమాసేన్, మహేశ్ రౌత్‌లే కారణమంటూ పోలీసులు వారిని అరెస్ట్ చేశారు.

అరెస్ట్ అనంతరం ఢిల్లీ కేంద్రంగా పనిచేసే రోనా విల్సన్ దగ్గర రాజీవ్ గాంధీ తరహాలో మోడీని హత్య చేసేందుకు కుట్రకు ప్లాన్ చేసినట్లుగా ఓ లేఖ దొరికిందని పోలీసులు పేర్కొన్నారు. మోడీ హత్యకు సంబంధించిన వివరాలు అందులో ఉన్నాయని, అందుకు అవసరమైన ఆర్ధిక సాయం వరవరరావే చూసుకుంటారనట్లు ఆ లేఖలో ఉన్నట్లు పోలీసులు చెప్పారు. అయితే, ఆ లేఖ పోలీసుల కల్పితమని వరవరరావు ఆరోపించారు. అంతేకాదు కాంగ్రెస్ పార్టీకి చెందిన సంజయ్ నిరూపమ్ వంటి నేతలతో పాటు అనేక హక్కుల సంఘాలు, రచయితల సంఘాల నేతలు ఆ లేఖ కల్పితమని విమర్శించారు.