కిడ్నాప్‌కు యత్నం.. పసిగట్టిన యువతి.. చివరకు
దిశ, వెబ్‌డెస్క్: తూర్పుగోదావరి జిల్లాలో ఆసక్తికర ఘటన చోటుచేసుకుంది. యువతిని కిడ్నాప్ చేసేందుకు ఓ ఆటో డ్రైవర్ యత్నంచగా, పసిగట్టి పోలీసులకు పట్టించింది. వివరాళ్లోకి వెళితే.. పిఠాపురం సమీపంలోని గొల్లప్రోలుకి చెందిన ఓ యువతి కాకినాడలో నివాసముంటూ.. ఓ ప్రైవేట్ ఆస్పత్రిలో స్టాఫ్ నర్సుగా పనిచేస్తోంది. తన తల్లిని చూసేందుకు గొల్లప్రోలు వచ్చింది. అనంతరం తిరిగి కాకినాడ వెళ్లేందుకు స్థానిక ఉప్పాడ సెంటర్‌లో రాత్రి వేళలో ఓ ఆటో ఎక్కింది. దీంతో మహిళ ఒంటరిగా ఉండటాన్ని గమనించిన ఆ ఆటో డ్రైవర్, చిత్రాడలోని మహాలక్ష్మి ఆలయ సమీపంలో రూటు మార్చాడు. కాకినాడ వైపు కాకుండా పుంతరోడ్డులోకి మళ్లించాడు.
గమనించిన యువతి భయాందోళనకు గురైంది. ఇటువైపు ఎందుకు తిప్పావని అడగ్గా, అనుమానస్పదంగా సమాధానం ఇచ్చాడు. దీంతో ఆందోళన చెందిన ఆ యువతి కిడ్నాప్ చేస్తున్నట్టు గుర్తించి ఆటోలో నుంచి దూకేసింది. దీంతో ఆమెకు స్పల్ప గాయాలు అయ్యాయి. గమనించిన స్థానికులు వెళ్లి సాయం చేయగా, యువతి వారికి విషయం చెప్పింది. దీంతో వారు ఆటో డ్రైవర్ కర్రి నాగబాబుని చితకబాది పోలీసులకు అప్పగించారు. గాయాలపాలైన యువతిని కాకినాడ ప్రైవేట్ ఆస్పత్రికి తరలించారు.
