పాఠశాల స్థలాల్లో ఆ నిర్మానాలు వద్దు : హైకోర్టు

దిశ, ఏపీ బ్యూరో: ఆంధ్రప్రదేశ్ రాష్ట్రంలోని ప్రభుత్వ పాఠశాలల స్థలాల్లో రైతు భరోసా కేంద్రాలు, గ్రామ/ వార్డు సచివాలయాల నిర్మాణాలు చేపట్టడంపై హైకోర్టు అసహనం వ్యక్తం చేసింది. ప్రభుత్వ పాఠశాల ఆవరణలలో ఇలాంటి నిర్మాణాలు చేపట్టొద్దని సూచించింది. ప్రభుత్వ పాఠశాలల్లో ఆర్బీకేలు, సచివాలయాలు నిర్మిస్తున్నారంటూ దాఖలైన పిటిషన్లపై మంగళవారం హైకోర్టు విచారణ చేపట్టింది. ఈ విచారణకు ఏపీ ప్రభుత్వానికి చెందిన ఏడుగురు ఐఏఎస్ అధికారులు హాజరయ్యారు. గోపాల కృష్ణ ద్వివేదీ, గిరిజా శంకర్, చినవీరభద్రుడు, బి.రాజశేఖర్,శ్యామలరావుతో మరో ఇద్దరు అధికారులు విచారణకు హాజరయ్యారు.

రాష్ట్రవ్యాప్తంగా 1,160 గ్రామ/ వార్డు సచివాలయాలు, ఆర్బీకేలు నిర్మించినట్లు కోర్టుకు తెలియజేశారు. అయితే వాటిలో 450 పైగా నిర్మాణాలను వేరోచోటుకు తరలించినట్లు అధికారులు ధర్మాసనానికి వివరించారు. మిగిలిన నిర్మాణాలను 4వారాల్లో తొలగించాలని రాష్ట్ర ప్రభుత్వాన్ని హైకోర్టు ఆదేశించింది. తదుపరి విచారణను అక్టోబర్ ఒకటికి వాయిదా వేసింది.