సోదరుడు జగన్‌ను భయంకరమైన రాక్షసుడితో పోల్చిన YS షర్మిల
దిశ, వెబ్‌డెస్క్: ఆంధ్రప్రదేశ్ ముఖ్యమంత్రి, సోదరుడు జగన్‌పై ఏపీ కాంగ్రెస్ చీఫ్ వైఎస్ షర్మిల ఫైర్ అయ్యారు. పార్లమెంట్ ఎన్నికల ప్రచారంలో భాగంగా ఆదివారం ఆమె కడపలో మాట్లాడుతూ.. సీఎం జగన్‌ను ఓ కుంభకర్ణుడు.. ఇన్ని రోజులు రాష్ట్రాన్ని పట్టించుకోకుండా సరిగ్గా ఎన్నికలకు ఆరు నెలల ముందు నిద్ర లేచాడని సోదరుడు జగన్ రాక్షసుడితో పోల్చారు. వైఎస్ వివేకాను హత్య చేసిన వాళ్లు యథేచ్చగా బయట తిరుగున్నారని.. అన్ని ఆధారాలు ఉన్న నిందితులపై ఎలాంటి చర్యలు తీసుకోవడం లేదని మండిపడ్డారు. వైఎస్ వివేకాను హత్య చేసిన నిందితుడికే సీఎం జగన్ మళ్లీ ఎంపీ టికెట్ ఇచ్చారని.. హత్య చేసిన వాళ్లను మళ్లీ గెలిపించాలని చూస్తున్నారని ఆగ్రహం వ్యక్తం చేశారు.
ఈ సారి ఎన్నికల్లో ఒకవైపు వైఎస్ బిడ్డ.. మరోవైపు వివేకాను హత్య చేసిన నిందితుడు పోటీ చేస్తున్నారని అన్నారు. నిందితులు చట్ట సభలకు వెళ్లకూడదనే తాను కడప ఎంపీగా పోటీ చేస్తున్నానని ఆమె స్పష్టం చేశారు. కాగా, వచ్చే పార్లమెంట్ ఎన్నికల్లో వైఎస్ షర్మిల కడప కాంగ్రెస్ అభ్యర్థిగా బరిలోకి దిగుతుండగా.. అధికార వైసీపీ నుండి సిట్టింగ్ ఎంపీ వైఎస్ అవినాష్ రెడ్డి పోటీ చేస్తున్నాడు. వైఎస్ కుటుంబ సభ్యులు ప్రజా క్షేత్రంలో తలపడుతుండటంతో ఈసారి కడప పార్లమెంట్ ఎన్నిక రాష్ట్రవ్యాప్తంగా హాట్ టాపిక్‌గా మారింది.
