Varun Tej : థియేటర్ లో మట్కా మూవీ ట్రైలర్ ను విడుదల చేసిన మెగాహీరో వరుణ్ తేజ్ సందడి
దిశ, వెబ్ డెస్క్: మెగాహీరో వరుణ్ తేజ్ విజయనగరంలో సందడి చేశారు. తను హీరోగా నటించిన నూతన చిత్రం మట్కా ట్రైలర్ విడుదలను మూవీ టీమ్ వినూత్నంగా నిర్వహించింది. నిజానికి మట్కా మూవీ ట్రైలర్ ను ఈ నెల 2న మెగాస్టార్ చిరంజీవి చేతుల మీదుగా విడుదల చేశారు. దానికి కొనసాగింపుగా స్థానిక ఆదిత్య థియేటర్ లో అభిమానులు కోలాహలం మధ్య మెగాహీరో వరుణ్ తేజ్ మట్కా సినిమా ట్రైలర్ విడుదల చేశారు. థియేటర్ లో మట్కా మూవీ ట్రైలర్ ను చూసిన అభిమానులు ఈలలు, కేకలతో హోరెత్తించారు. మట్కా మూవీ ట్రైలర్ విడుదలకు ముందు వరుణ్ తేజ్ పైడితల్లి అమ్మవారిని దర్శించుకున్నారు. ఈ సందర్భంగా వరుణ్ తేజ్ మీడియాతో మాట్లాడారు. గద్దల కొండ గణేష్ మూవీ తర్వాత మరోసారి మళ్ళీ మట్కా మాస్ సినిమాతో ప్రేక్షకుల ముందుకు రాబోతున్నానన్నారు. ఈ నెల 14న మట్కా సినిమా విడుదల కాబోతుందని, మెగా అభిమానులు, ప్రేక్షకులంతా ఆశీర్వదించి మట్కా సినిమాను విజయవంతం చేయాలని కోరారు. మట్కా ట్రైలర్ ను ప్రేక్షకుల మధ్యలో విడుదల చేసి వారి స్పందనను కళ్ళారా చూసేందుకు ఇక్కడికి రావడం జరిగిందన్నారు.
కాగా అంతకుముందు హీరో వరుణ్ తేజ్ థియేటర్ కు వస్తున్నారని తెలిసిన ఆయన అభిమానులు బ్యాండ్ మేళాలు, బాణసంచాతో సందడి చేశారు. వరుణ్ తేజ్ ను చూసేందుకు వేలాదిగా తరలివచ్చిన అభిమానుల తోపులాటలో థియేటర్ గ్లాస్ డోర్లు పగిలిపోగా, ఈ ఘటనలో ఓ అభిమానికి గాయాలయ్యాయి. మెగా ప్రిన్స్ వరుణ్ తేజ్ హీరోగా కరుణ కుమార్ దర్శకత్వంలో వస్తున్న మట్కా చిత్రాన్ని వైర ఎంటర్‌టైన్‌మెంట్స్, ఎస్ఆర్టీ ఎంటర్‌టైన్‌మెంట్స్‌పై డాక్టర్ విజయేందర్ రెడ్డి తీగల, రజనీ తాళ్లూరి హై బడ్జెట్ తో నిర్మించారు. మీనాక్షి చౌదరి, నోరా ఫతేహి హీరోయిన్స్ గా నటిస్తున్నారు. ఈ మూవీ టీజర్, ట్రైలర్ ఇప్పటికే సినిమాపై హైప్ పెంచేశాయి. స్టార్ మ్యూజిక్ డైరెక్టర్ జివి ప్రకాష్ కుమార్ కంపోజ్ చేసిన మట్కా ఆల్బమ్ చార్ట్ హిట్ అయ్యింది. ప్రేక్షకులు ఎంతగానో ఎదురుచూస్తున్న ‘మట్కా’ నవంబర్ 14న ప్రేక్షకులు ముందుకు రానుంది. బర్మా నుంచి శరణార్థి గా వైజాగ్ వచ్చిన వాసు అనే అబ్బాయి కథే మట్కా. 1958 నుంచి 82 వరకు తను అంచెలంచెలుగా ఎలా ఎదిగాడు అనేది సినిమా కథనంగా వరుణ్ తేజ్ వెల్లడించారు.
Read More ...
Matka movie: మట్కా సినిమాపై మెగా హీరో ఇంట్రెస్టింగ్ కామెంట్స్..!!
