మంగళగిరిలో ఆపరేషన్ ఆకర్ష్..

దిశ, ఏపీ బ్యూరో: మంగళగిరి వైసీపీలో కుదుపు మొదలైంది. తెలుగుదేశం పార్టీ పిలుస్తోంది రా..కదలిరా కార్యక్రమంతో ఆ పార్టీ నేతలంతా టీడీపీలోకి క్యూ కడుతున్నారు. మంగళగిరి వైసీపీ నేతలు ప్రముఖ వ్యాపారవేత్త అందె వెంకట ప్రసాద్, ఖాజా, పీఏసీఎస్ మాజీ చైర్మన్ పల్నాటి నాగేశ్వరరావులతో పాటు మరో 100 కుటుంబాలు, వివిధ రంగాలకు చెందిన ప్రముఖులు, వైసీపీ నాయకులు నారా లోకేష్ సమక్షంలో టీడీపీలో చేరారు. ఈ సందర్భంగా వారికి లోకేష్ టీడీపీ కండువాలు వేసి పార్టీలోకి సాదరంగా ఆహ్వానించారు.

నారా లోకేష్ మాట్లాడుతూ మంగళగిరి నియోజకవర్గ సర్వతోముఖాభివృద్ధికి అంతా కలిసి పని చేద్దామని పిలుపునిచ్చారు. టీడీపీలో అన్నివర్గాలకు సముచిత స్థానం లభిస్తుందన్నారు. ఇప్పటికే పార్టీ కోసం పని చేస్తున్న నేతలను కలుపుకొని రాబోయే రోజుల్లో పార్టీ విజయానికి కృషి చేయాలని పిలుపునిచ్చారు. అంతకుముందు పట్టణంలో కార్లు, బైకులతో లోకేశ్ భారీ ర్యాలీ నిర్వహించారు.