తిరుమల ఘాట్ రోడ్డులో తప్పిన పెను ప్రమాదం..పిట్టగోడను ఢీకొన్న బస్సు

దిశ ప్రతినిధి,తిరుపతి:తిరుమల రెండో ఘాట్ రోడ్డులో పెను ప్రమాదం తృటిలో తప్పింది. తిరుమలకు వెళ్లే రెండవ ఘాట్ రోడ్ లో వినాయక స్వామి ఆలయం దాటిన తర్వాత భక్తులతో వెళుతున్న ఆర్టీసీ బస్సు ఓ మలుపు వద్ద ఒక్కసారిగా ఎడమ వైపుకు తిరిగి పిట్టగోడ ను ఢీకొంది. దీంతో బస్సు ముందు రెండు టైర్లు లోయలోకి వేలాడయి. అప్రమత్తమైన డ్రైవర్ చాకచక్యంగా బస్సును రోడ్డుకు అడ్డంగా నిలిపేశారు.ఆందోళనకు గురైన భక్తులు వెంటనే బస్సులో నుంచి కిందకు దిగేశారు. ఈ ఘటనలో ఎవరికీ ఎలాంటి గాయాలు కాలేదు. సమాచారం అందుకున్న టీటీడీ విజిలెన్స్ ఆర్టీసీ అధికారులు సంఘటన స్థలానికి చేరుకొని ప్రమాదంపై విచారణ చేపట్టారు. ప్రమాదానికి గల కారణాలు తెలియాల్సి ఉంది.