సమస్యల పరిష్కారానికి కృషి
దిశ, నేరడిగొండ : నేరడిగొండ మండలంలోని లక్ష్మీపూర్, పీచర, నాగమాల్యాల్ గ్రామాల్లో బోథ్ ఎమ్మెల్యే అనిల్ జాదవ్ బుధవారం పర్యటించారు. ఈ సందర్భంగా గ్రామస్తులు పెద్ద ఎత్తున పాల్గొని ఘన స్వాగతం పలికారు. గ్రామంలో రచ్చబండ వద్ద కూర్చొని గ్రామస్తులతో ముచ్చటిస్తూ నెలకొన్న సమస్యలను అడిగి తెలుసుకున్నారు. గ్రామాల సందర్శనకు వచ్చిన ఎమ్మెల్యేని గ్రామస్తులు, యువకులు ఘనంగా సన్మానించారు.
అనంతరం ఎమ్మెల్యే అనిల్ జాదవ్ మాట్లాడుతూ గ్రామాల్లో నెలకొన్న సమస్యలను తెలుసుకొని పరిష్కరించడానికే గ్రామాల పర్యటనలు చేస్తున్నానని, ప్రధానంగా మారుమూల గిరిజన గ్రామాలపై ప్రత్యేక శ్రద్ధ చూపుతానని అన్నారు. గతంలో ఎమ్మెల్యేగా లేకపోయినా గ్రామానికి గ్రావెల్ రోడ్డు వేశానని, ఇప్పుడు ఎంతో బాధ్యత కూడా ఉందని తెలిపారు. గ్రామస్తుల కోరిక మేరకు రెండు రోజుల క్రితమే గ్రామానికి రెండు హైమాస్ట్ లైట్లను ఏర్పాటు చేశామని అన్నారు. ఈ కార్యక్రమంలో మాజీ ఎంపీపీ రాథోడ్ సజన్, నెరడిగొండ మాజీ ఉప సర్పంచ్ దేవేందర్ రెడ్డి, సురేందర్, సంతోష్ తో పాటు తదితరులు పాల్గొన్నారు.
