నడిరోడ్డుపై రక్తం మరకలు.. వ్యక్తి దారుణ హత్య

దిశ, కోసిగి: గండీడ్‌ మండలంలో ఓ వ్యక్తి దారుణహత్య కలకలం రేపింది. బండరాయితో ముఖంపై కొట్టి అతి కిరాతకంగా చంపేశారు గుర్తు తెలియని దుండగులు. స్థానిక ఎస్సై రాముడు తెలిపిన వివరాలు ఇలా ఉన్నాయి. లింగయ్యపల్లి గ్రామంలో ఏదుల మల్లేష్ భార్య, కూతురితో నివాసం ఉంటున్నాడు. వృత్తికోసం మాత్రం సమీపంలోని కోసిగి మండలానికి నడిచే వెళ్లేవాడు. ఈ క్రమంలోనే శనివారం రాత్రి 8 గంటలకు ఇంటి నుంచి కోసిగి వైపు వెళ్లిన మల్లేష్ ఎంతకీ తిరిగిరాలేదు. దీంతో ఆందోళన చెందిన కుటుంబీకులు వెతుకులాట ప్రారంభించారు. ఇక ఆదివారం తెల్లవారుజామును అటుగా వెళ్లిన స్థానికులు నడిరోడ్డుపై రక్తం మరకలతో పడిఉన్న మృతదేహాన్ని చూసి ఒక్కసారిగా ఖంగుతిన్నారు. వెంటనే పోలీసులకు సమాచారం అందించారు. ఘటనా స్థలానికి చేరుకున్న పోలీసులు హత్య చేయబడ్డది ఏదుల మల్లేష్‌గా గుర్తించి.. కుటుంబ సభ్యులకు సమాచారం ఇచ్చారు. ఈ హత్య ఘటనపై కేసు నమోదు చేసుకున్నామని.. ఛేదన కోసం మూడు ప్రత్యేక బృందాలను ఏర్పాటు చేశామని ఎస్సై రాముడు వివరించారు.