‘ఆవుకు వైభవంగా సీమంతం’ చేసి మురిసిపోయిన రైతు..

దిశ, ముధోల్: మూగజీవాలకు మనిషివలె స్థానం కల్పించి, తమ కుటుంబంలో ఒక ఆడపడుచుగా భావించి అల్లారుముద్దుగా పెంచుకుంటున్న ఆవుకి శ్రీమంతం వేడుకలు నిర్వహించారు ఓ రైతు. వివరాల్లోకి వెళితే.. కుబీర్ మండలం పల్సి గ్రామంలో పురంశెట్టి శ్రీరాములు అనే రైతుకు ఇద్దరు ఆడపిల్లలు. వారితో పాటు తమ ఆవుని కూడా సొంత కూతురిలా పెంచుకుంటున్నారు. ఈ క్రమంలో ఆ ఆవు గర్భం దాల్చింది. ఇక వారి ఆనందానికి అవధుల్లేకుండా పోయాయి. దీంతో వారు ‘ఆవుకు వైభవంగా సీమంతం’ చేశారు. తన కూతురికే సీమంతం చేస్తున్నంత వైభవంగా వేడుక చేశారు.

సోమవారం ఆ రైతు చేసిన సీమంతం శుభకార్యాన్ని గ్రామ ప్రజలు చూసి ఆశ్చర్యపోయారు. కన్న కూతురికి ఏవిధంగా అయితే సీమంతం చేస్తారో.. తాను పెంచుకుంటున్న ఆవుకి కూడా సీమంతం చేశారు. సీమంతం వేళ ఏ విధంగా ముస్తాబు చేస్తారో ఆ విధంగా ముస్తాబు చేసి వేడుక నిర్వహించారు. ఈ సీమంతం కార్యక్రమానికి గ్రామంలోని ముత్తైదువులు, వనితలు వచ్చి వేద పండితుల విజయ్ కుమార్ సమక్షంలో హారతులు పూజా కార్యక్రమాలు నిర్వహించి ఆవును ఆశీర్వదించారు.