Farmer die : ట్రాక్టర్​ కింద పడి రైతు దుర్మరణం

దిశ, జగదేవ్ పూర్ : ప్రమాదవశాత్తు ట్రాక్టర్ కింద పడి రైతు దుర్మరణం చెందిన సంఘటన గురువారం మధ్యాహ్నం సిద్ధిపేట జిల్లా జగదేవ్ పూర్ మండల పరిధిలోని లింగారెడ్డిపల్లి గ్రామంలో చోటుచేసుకుంది. స్థానిక ఎస్ఐ చంద్రమోహన్ కథనం ప్రకారం వివరాలిలా ఉన్నాయి. గ్రామానికి చెందిన కొమురవెల్లి సత్యం (32) అనే రైతు తన వ్యవసాయ పొలం వద్ద ట్రాక్టర్ తో బురద పొలం దున్నుతున్నాడు. ఈ క్రమంలో పొలంలో ట్రాక్టర్ కు అడ్డుగా ఉన్న పైపును తొలగించడానికి ట్రాక్టర్ ఇంజన్ ఆపివేయకుండా పొలంలో కిందకు దిగాడు. పైపును తొలగించి ట్రాక్టర్ ఎక్కుతున్న

క్రమంలో సత్యం కాలుజారి పొలంలోకి పడిపోగా ట్రాక్టర్ గేరుకు తగిలి ట్రాక్టర్ సత్యంపై నుంచి వెళ్లింది. దీంతో కాలుతొడ నుంచి పై భాగం వరకు తీవ్ర గాయాలయ్యాయి. దాంతో సత్యంను చికిత్స నిమిత్తం గజ్వేల్ ప్రభుత్వ ఆసుపత్రికి తరలించగా పరిస్థితి విషమించడంతో హైదరాబాద్ కు తరలిస్తుండగా మృతి చెందాడు. మృతుడికి భార్య అనిత, ఒక కూతురు, కుమారుడు ఉన్నారు. మృతుడి తండ్రి కొమురవెల్లి నర్సింలు ఇచ్చిన ఫిర్యాదు మేరకు కేసు నమోదు చేసుకొని మృతదేహాన్ని పోస్టుమార్టం నిమిత్తం గజ్వేల్ ప్రభుత్వ ఆసుపత్రికి తరలించినట్లు ఎస్ఐ చంద్రమోహన్ వివరించారు.