జొమాటో గోల్డ్.. ఇకపై ‘జొమాటో ప్రో’

దిశ, వెబ్‌డెస్క్: ప్రముఖ ఫుడ్ డెలివరీ యాప్స్‌లో జొమాటో కూడా ఒకటి. ప్రస్తుతం భారతదేశంలోని 1,50,000 రెస్టారెంట్ల నుంచి రోజుకు 10-12 లక్షల ఆర్డర్‌‌లను స్వీకరిస్తున్న జొమాటో.. మొత్తంగా 556 నగరాల్లో తన సేవలను కొనసాగిస్తోంది. ఈ క్రమంలో తమ ప్రీమియం కస్టమర్లకు మరింత ఉత్తమ సేవలను అందించేందుకు గాను గురుగ్రామ్‌కు చెందిన ఈ సంస్థ ఇదివరకే ‘జొమాటో గోల్డ్’ అనే అవకాశాన్ని కల్పించింది. ఇప్పుడు ఆగస్టు 1 నుంచి జొమాటో గోల్డ్ మెంబర్స్‌ను ‘జొమాటో ప్రో’ మెంబర్లుగా అప్‌గ్రేడ్ చేస్తోంది.

ఈ-కామర్స్ సంస్థలు.. ఫాస్ట్ డెలివరీ, ఫ్రీ డెలివరీ, అధిక ఆఫర్ల కోసం పెయిడ్ మెంబరషిప్ అందిస్తుంటాయి కదా! అలానే జొమాటో గోల్డ్ కూడా ఓ పెయిడ్ మెంబర్‌షిప్ అన్నమాట. ఈ మెంబర్స్ జొమాటోతో అనుబంధమున్న రెస్టారెంట్లలో ఫుడ్ ఆర్డర్ చేస్తే.. వన్ ప్లస్ వన్ ఆఫర్ వర్తిస్తుంది. అదే డ్రింక్స్ విషయానికొస్తే.. 2 ప్లస్ వన్ ఆఫర్ వస్తుంది. ఇప్పుడు ఆ గోల్డ్ మెంబర్‌షిప్‌ను మరింత విస్తరిస్తూ.. ‘‘జొమాటో ప్రో’’గా తీసుకొస్తున్నట్లు జొమాటో సీఈవో దీపిందర్ గోయల్ ట్విట్టర్ ద్వారా వెల్లడించాడు. గోల్డ్‌తో పోల్చుకుంటే.. ప్రోలో మరిన్ని ఎక్కువ రెస్టారెంట్లు తమ జాబితాలో చేరినట్లు తెలిపారు.

ప్రో మెంబర్లు.. ఫాస్ట్ అండ్ టాప్ ప్రయారిటీ డెలివరీ పొందుతారు. ఎక్స్‌క్లూజివ్ ఆఫర్లతో పాటు మనీ బ్యాక్ గ్యారెంటీ అవకాశం కూడా పొందుతారు. జొమాటో ప్రో మెంబర్‌షిప్ సంవత్సరానికి రూ. 1800/- కాగా, ఆరు నెలలకు రూ. 999/-గా ఉంది. ప్రస్తుతం వార్షిక మెంబర్‌షిప్‌పై డిస్కౌంట్ అందిస్తుండగా.. దాని విలువ కేవలం రూ. 1620/-గా ఉంది.