‘వెల్ కమ్’ ఫ్యాన్స్‌కు బిగ్ సర్‌ప్రైజ్.. పట్టాలెక్కనున్న పార్ట్3

దిశ, సినిమా: 2007లో విడుదలైన బాలీవుడ్ యాక్షన్-కామెడీ చిత్రం ‘వెల్‌కమ్’. ఈ సినిమాలో అక్షయ్ కుమార్, కత్రినా కైఫ్, అనిల్ కపూర్, నానా పటేకర్, పరేష్ రావల్ ముఖ్యపాత్రల్లో కనిపించగా సినిమా ప్రేక్షకుల మదిలో చెరగని ముద్ర వేసింది. దీంతో 2015లో జాన్ అబ్రహం, శ్రుతి హాసన్‌ జంటగా సెకండ్ పార్ట్‌ కూడా మేకర్స్ తెరకెక్కించడంతో అదే ఊపు కొనసాగించింది. తాజాగా ఈ మూవీ మూడవ భాగాన్ని ప్రేక్షకుల ముందుకు తీసుకొచ్చే పనిలో నిర్మాత ఫిరోజ్ నడియాడ్‌వాలా, దర్శకుడు అనీష్ బజ్మీ బిజీగా ఉన్నట్లు తెలుస్తోంది.

‘వెల్ కమ్3 స్క్రిప్ట్ ఇప్పటికే తయారవుతోంది. వచ్చే ఏడాది చివరి భాగంలో దీన్ని సెట్స్‌పైకి తీసుకెళ్లాలని ప్లాన్ చేస్తున్నారు. ఇక ఈ మూడో పార్ట్‌లో అనిల్‌ కపూర్, నానా పటేకర్, పరేష్ రావల్ ప్రధాన పాత్రల్లో కనిపించనున్నారు. ఫిరోజ్ నడియాడ్‌వాలా ఈ చిత్రాన్ని భారీ స్థాయిలో రూపొందించడానికి ప్లాన్ చేస్తున్నారు. ఇది కూడా పూర్తి యాక్షన్-కామెడీగానే ఉంటుంది’ అని సన్నిహిత వర్గాలు వెల్లడించాయి.