ఐపీఎల్ ఫ్యాన్స్‌కు గుడ్ న్యూస్.. మిగిలిన మ్యాచ్‌ల డేట్స్ కన్ఫార్మ్
దిశ, స్పోర్ట్స్ : కరోనా కారణంగా అర్దాంతరంగా వాయిదా పడిన ఐపీఎల్ 2021 మిగిలిన మ్యాచ్‌లను యూఏఈలో నిర్వహించనున్నారు. ఈ మేరకు బీసీసీఐ నిర్ణయం తీసుకున్నట్లు ఒక జాతీయ దినపత్రిక కథనం ప్రచురించింది. భారత జట్టు ఇంగ్లాండ్‌తో 5 టెస్ట్ మ్యాచ్‌లు ఆడనున్నది. సెప్టెంబర్ 14న ఈ టెస్ట్ సిరీస్ ముగియనుండటంతో సెప్టెంబర్ 15 నుంచి అక్టోబర్ 15 వరకు యూఏఈ వేదికగా ఐపీఎల్‌లోని మిగిలిన 31 మ్యాచ్‌లు నిర్వహించడానికి నిర్ణయించినట్లు ఆ కథనంలో పేర్కొన్నారు.
ఇంగ్లాండ్‌లో భారత జట్టు ఎలాగో బయోబబుల్‌లో ఉంటుంది కాబట్టి.. నేరుగా అందరూ యూఏఈ చేరుకొని బయోబబుల్‌లోనికి వెళ్లే అవకాశం ఉన్నట్లు తెలుస్తున్నది. 30 రోజుల్లో 31 మ్యాచ్‌లు నిర్వహించనున్నారు. వీటిలో 8 డబుల్ హెడర్ మ్యాచ్‌లు ఉంటాయని సమాచారం. ఈ నెల 29న జరుగనున్న బీసీసీఐ ప్రత్యేక జనరల్ సమావేశంలో ఈ మేరకు నిర్ణయం తీసుకునే అవకాశం ఉన్నది. ఇప్పటికే ఎమిరేట్స్ క్రికెట్ బోర్డుతో కూడా సంప్రదింపులు పూర్తయ్యాయని తెలుస్తున్నది.
