ట్విట్టర్ ఇండియా పబ్లిక్ పాలసీ హెడ్ రాజీనామా

న్యూఢిల్లీ: సామాజిక మాధ్యమం ట్విట్టర్ ఇండియా పబ్లిక్ పాలసీ డైరెక్టర్ మహిమా కౌల్ శనివారం రాజీనామా చేశారు. వ్యక్తిగత కారణాలతోనే తాను రాజీనామా చేసినట్టు పేర్కొన్నారు. మహిమా కౌల్ రాజీనామాన ట్విట్టర్ ధ్రువీకరించింది. ఆమె రాజీనామాకు ఇటీవల జరిగిన సంఘటనలతో సంబంధం లేదని ట్విట్టర్ పబ్లిక్ పాలసీ ఉపాధ్యక్షులు మోనిక్ మీష్ తెలిపారు. మార్చి చివరి వరకు ఆమెనే ట్విట్టర్ ఇండియా పబ్లిక్ పాలసీ డైరెక్టర్‌గా కొనసాగుతారని వివరించారు. ఐదేళ్లపాటు ఈ బాధ్యతలు నిర్వర్తించిన మహిమా కౌల్ తప్పుకోవడం తమకూ బాధాకరంగా ఉన్నదని, ఆమె వ్యక్తిగత జీవితానికీ సమయాన్ని కేటాయించాలన్న కౌల్ నిర్ణయాన్ని గౌరవిస్తున్నామని తెలిపారు. రైతు ఆందోళనల సందర్భంగా కేంద్ర ప్రభుత్వం విజ్ఞప్తి చేసిన ట్విట్టర్ ఖాతాలను పునరుద్ధరించడంపై సంస్థకు హెచ్చరికలు వచ్చాయి. కానీ, కౌల్ రాజీనామాకు వీటితో సంబంధం లేదని సంబంధితవర్గాలు తెలిపాయి.