జాతీయ దృక్పథంతో బాధ్యతలు నిర్వర్తించాలి
దిశ, క్రైమ్బ్యూరో: సివిల్ సర్వీస్ అభ్యర్థులు జాతీయ దృక్పథంతో ఉద్యోగ బాధ్యతలు నిర్వర్తించాలని హోంశాఖ మాజీ కార్యదర్శి, పద్మభూషణ్ అవార్డు గ్రహీత కె.పద్మనాభయ్య సూచించారు. వ్యవసాయం, వాణిజ్యం, పరిశ్రమల విభాగాల్లో తమ ప్రత్యేకతను చాటు కోవాలన్నారు. యూపీఎస్సీ సీఎస్ఈ -2019లో విజయం సాధించిన అభ్యర్థులకు నేరేడ్మెట్ రాచకొండ పోలీస్ కమిషనరేట్ కార్యాలయంలో సీపీ మహేష్ భగవత్ ఆధ్వర్యంలో గురువారం అభినందన కార్యక్రమం నిర్వహించారు.
ఈ సందర్భంగా కె.పద్మనాభయ్య మాట్లాడుతూ సర్వీస్‌లో ఐఏఎస్ లేదా ఐపీఎస్ ఒంటరిగా పనిచేయలేరన్నారు. ప్రభుత్వంలోని అన్నిరంగాల అధికారులుతో పాటు సమాజంలోని మేధావులతో కూడా స్నేహం చేయాల్సిన అవసరం ఉందన్నారు. సివిల్ సర్వీస్ సుధీర్ఘ ప్రయాణం అన్నారు. సివిల్ సర్వెంట్లు స్థానిక భాష, చట్టాలను నేర్చుకోవాలన్నారు. అప్పుడు మాత్రమే క్షేత్ర స్థాయి అంశాలపై అవగాహన కలుగుతుందన్నారు. పేదలు, నిరుపేదల పట్ల సానుకూలంగా ఉండాలన్నారు. సీపీ మహేష్ భగవత్ మాట్లాడుతూ సివిల్ సర్వీస్ సాధించిన తర్వాత విజయాన్ని గర్వంగా ఫీల్ కావద్దన్నారు. యూపీఎస్సీకి షార్ట్‌ కట్‌లు లేవన్నారు. పట్టుదల, అంకితభావం, కృషి అవసరం అన్నారు. కార్యక్రమంలో ఏపీ ప్రభుత్వ ఫైనాన్స్ విభాగం ప్రత్యేక కార్యదర్శి సాధు నర్సింహ‌రెడ్డి పాల్గొన్నారు. తెలంగాణ, ఏపీ నుంచి సివిల్స్ సాధించిన 15మంది అభ్యర్థులను సత్కరించారు.
