Udupi: రోడ్ల సమస్యలపై ఉడుపి వాసుల వినూత్న నిరసన

దిశ, డైనమిక్ బ్యూరో: ఉడుపి రోడ్లపై యమధర్మరాజు, చిత్రగుప్తుడు లాంగ్ జంప్ కాంపిటేషన్ నిర్వహించిన వీడియో నెట్టింట చక్కర్లు కొడుతోంది. కర్ణాటకలో ఇటీవల కురిసిన భారీ వర్షాలకు ఉడుపి జిల్లాలో రోడ్లు గుంతల మయంగా అయ్యాయి. దీంతో వాహనదారులు తీవ్ర ఇక్కట్లు పడుతున్నారు. దీనిపై ఫిర్యాదు చేసిన అధికారులు పట్టించుకోకపోవడంతో.. ఉడుపికి చెందిన కొందరు యువకులు రోడ్లపై గుంతల కారణంగా ప్రజలు పడుతున్న ఇబ్బందులను అధికారుల దృష్టికి తీసుకెళ్లేందుకు వినూత్న నిరసన చెపట్టారు. యమధర్మరాజు, చిత్రగుప్తుడి వేషధారణలు ధరించి, రోడ్ల గుంతలపై లాంగ్ జంప్ కాంపిటీషన్ నిర్వహించారు.

ఎవరు పెద్ద గుంతను దూకగల్గితే వారు ఎక్కువ కాలం బ్రతుకుతారని చెబుతూ.. దూకిన వారి దూరాలను కొలుస్తూ నిరసన తెలియజేశారు. దీనికి సంబందించిన వీడియో ప్రస్తుతం సోషల్ మీడియాలో వైరల్ గా మారింది. ఈ నిరసనపై అధికారులు తక్షణమే స్పందించాలని స్థానిక ప్రజలు కోరుతున్నారు. వీడియో చూసిన నెటిజన్లు.. సమస్యను అధికారుల దృష్టికి తీసుకెళ్లేందుకు సిగ్గుపడకుండా మీరు చేసిన ప్రయత్నం బాగుందని, ఇలా అయినా వారికి దయ కలుగుతుందేమోనని అంటున్నారు. అంతేగాక ఇప్పటికైనా అధికారులు స్పందించి వారి సమస్యను తీరిస్తే బాగుంటుందని కోరుకుంటున్నారు.