భయం గుప్పిట్లో సల్మాన్.. భారీ భద్రత మధ్య బిగ్ బాస్ షూట్

దిశ, వెబ్ డెస్క్ : బాలీవుడ్ అగ్ర కథానాయకుడు సల్మాన్ ఖాన్ కు లారెన్స్ బిష్ణోయ్ గ్యాంగ్ నుండి చంపేస్తామనే బెదిరింపులు వచ్చిన విషయం తెలిసిందే. ఈ నేపథ్యంలో హిందీలో మోస్ట్ పాపులర్ షో బిగ్ బాస్ కు హోస్టింగ్ చేస్తాడా లేదా అని ప్రేక్షకులు ఉత్కంఠతతో ఎదురు చూస్తున్నారు. కాగా సల్మాన్ "బిగ్ బాస్ 18" షూట్ కోసం మూడంచెల భద్రతా వలయం నడుమ గురువారం రాత్రి సెట్లోకి అడుగుపెట్టినట్టు తెలుస్తోంది. దాదాపు 60 మంది సెక్యూరిటీతో షో నిర్వాహకులు కట్టుదిట్టమైన భద్రత ఏర్పాటు చేశారని, బయటి వారిని ఎవరినీ షూట్ జరిగే దారిదాపుల్లోకి కూడా అనుమతించలేదని, షోకు సంబంధించిన సిబ్బందిని సైతం వారి ఐడీ కార్డులు క్షుణ్ణంగా చెక్ చేసినా తర్వాతే లోపలికి అనుమతించారని సమాచారం.

కృష్ణజింకలను వేటాడిన కేసు నేపథ్యంలో లారెన్స్ బిష్ణోయ్ గ్యాంగ్ ఇప్పటికే సల్మాన్ ఖాన్ ను బెదిరించింది. సల్మాన్ ఖాన్ మిత్రుడు బాబా సిద్ధిఖీని హత్య చేసిన బిష్ణోయ్ గ్యాంగ్.. తరువాత లిస్ట్ లో ఉన్నది సల్మాన్ అని ప్రకటించడంతో అప్రమత్తమైన మహారాష్ట్ర సర్కార్ సల్లూ భాయ్ కి భారీ భద్రతను పెంచింది.