Nagababu: పవన్ కల్యాణ్ నవసందేహాలకు సమాధానం చెప్పండి : నాగబాబు

దిశ, ఏపీ బ్యూరో : Nagababu Demands to Answer 9 Doubts Of YS jagan Navaratnalu Scheme Raised By Pawan Kalyan| ఆంధ్రప్రదేశ్ రాష్ట్రంలో అమలు చేస్తున్న నవరత్నాలపై జనసేన అధ్యక్షుడు పవన్ కల్యాణ్ లేవనెత్తిన నవ సందేహాలకు సీఎం వైఎస్ జగన్ సమాధానం చెప్పాలని ఆ పార్టీ పీఏసీ సభ్యులు కొణిదెల నాగబాబు డిమాండ్ చేశారు. జనసేన పార్టీ ప్రభుత్వాలు అమలు చేస్తున్న సంక్షేమ పథకాలకు వ్యతిరేకం కాదని క్లారిటీ ఇచ్చిన నాగబాబు ప్రజలపై మోయలేని భారం వేస్తూ వసూలు చేస్తున్న పన్నుల రూపంలో వచ్చే ఆదాయాన్ని వైసీపీ దోచుకుంటుందని ఆరోపించారు. ఈ మేరకు శనివారం నాగబాబు ఓ ప్రకటన విడుదల చేశారు.

జనసేన పార్టీ అధికారంలోకి వస్తే ప్రతి పేద కుటుంబానికి రూ. పది లక్షల విలువైన సహాయం అందజేస్తామని వెల్లడించారు. వైసీపీ ప్రభుత్వం నవరత్నాల పేరుతో ప్రజలను మభ్యపెడుతున్న తీరును, ప్రజా ధనాన్ని దోచుకుంటున్న విధానాన్ని పార్టీ శ్రేణులు నాగబాబు దృష్టికి తీసుకొచ్చినట్లు ఆ ప్రకటనలో వెల్లడించారు. ఎన్నికల సమయంలో వైసీపీ నాయకత్వం ఆచరణ సాధ్యం కాని హామీలు ఇచ్చి ప్రజలను తప్పుదోవ పట్టించిందని ధ్వజమెత్తారు. తీరా అధికారంలోకి వచ్చిన తర్వాత ఇచ్చిన హామీలను నెరవేర్చడం సాధ్యం కాదని తెలిసి కుంటుసాకులు చెప్తూ ప్రజలను నవమోసాలకు గురి చేస్తున్నారని నాగబాబు ప్రకటనలో ఆరోపించారు.