ప్రారంభ వేడుకలు లేకుండానే ఐపీఎల్ షురూ..!

న్యూఢిల్లీ : మరో నాలుగు రోజుల్లో ఐపీఎల్-15 ప్రారంభకానుండగా.. తాజాగా బీసీసీఐ కీలక నిర్ణయం తీసుకుంది. లీగ్ ప్రారంభ వేడుకలను నిర్వహించకూడదని బోర్డు భావిస్తున్నది. అయితే, ఆరంభ వేడుకలను నిర్వహించకపోవడం ఇది తొలిసారి కాదు. చివరి సారిగా 2018 లో నిర్వహించారు. అనంతరం 2019లో ఆరంభ వేడుకులకు వెచ్చించే డబ్బును పుల్వామా ఘటనలో వీరమరణం పొందిన సీఆర్‌పీఎఫ్ జవాన్ల కుటుంబాలకు అందజేశారు. ఆ తర్వాత, 2020, 2021 లో కరోనా కారణంగా ఆరంభ వేడుకలు నిర్వహించలేదు.

అయితే, ఇటీవల దేశంలో కరోనా కేసుల తీవ్రత తగ్గినప్పటికీ..చైనాలో మరోసారి కరోనా విజృంభిస్తున్నది. ఈ నేపథ్యంలో కేంద్రం తాజాగా కోవిడ్ మార్గదర్శకాలను విడుదల చేసింది. ఈ క్రమంలో ఈ ఏడాది ఐపీఎల్ ప్రారంభ వేడుకలు లేకుండానే లీగ్ ప్రారంభించాలని భావిస్తున్నది. కాగా, ఈ నెల 26న ఐపీఎల్ షురూ కానుండగా.. వాఖండే వేదికగా జరిగే ఆరంభ మ్యాచ్‌లో చెన్నయ్ సూపర్ కింగ్స్, కోల్‌కతా నైట్ రైడర్స్ జట్లు తలపడనున్నాయి.