కొడుకు అఖిల్‌తో పోటీపడుతున్న నాగార్జున..
దిశ, సినిమా : బాలీవుడ్‌ స్టార్స్ అమితాబ్ బచ్చన్, అనిల్ కపూర్, రిషి కపూర్‌ల వారసులు కూడా ఫిల్మ్ ఇండస్ట్రీలో రాణిస్తున్న సంగతి తెలిసిందే. అయితే అభిషేక్, రణబీర్ తదితరులు బీటౌన్‌లో ఎదిగే సమయానికి వారి తండ్రులు క్యారెక్టర్ రోల్స్ చేయాల్సిన స్థాయికి పడిపోయారు. కానీ టాలీవుడ్‌ పరిస్థితి మాత్రం ఇందుకు భిన్నంగా ఉంది. రామ్ చరణ్, ఎన్టీఆర్, నాగ చైతన్య, రానా వంటి యంగ్ హీరోలకు వారి తండ్రులు లేదా బాబాయ్‌ల నుంచి పోటీ ఎదురవుతోంది. చిరంజీవి, నాగార్జున, బాలకృష్ణ, వెంకటేష్ వంటి సీనియర్లు ఇప్పటికీ కథానాయకులుగా అలరిస్తూ తెలుగు పరిశ్రమను షేక్ చేస్తున్నారు.
ఇదిలా ఉంటే.. నాగార్జున 'ది ఘోస్ట్' మూవీతో పాటు అతని చిన్న కొడుకు అఖిల్ నటించిన 'ఏజెంట్' చిత్ర టీజర్లు ఒకే టైమ్‌లో ప్రేక్షకుల ముందుకొస్తున్నాయి. మరో ఆసక్తికర విషయం ఏంటంటే.. తండ్రీ కొడుకులు ఇద్దరూ ఒకే విధమైన పాత్రలు చేశారు. 'ఏజెంట్' మూవీలో అఖిల్ తుపాకీలతో దుండగులను హతమార్చడం, 'ది ఘోస్ట్' టీజర్‌లో పొడవాటి కత్తితో నాగ్ చేసిన ఫైట్లను చూశాం. ఈ రెండు చిత్రాల్లోని యాక్షన్ సీక్వెన్స్‌లకు పోలికలున్న నేపథ్యంలో తండ్రీ కొడుకుల్లో ఎవరి సినిమా ప్రేక్షకాదరణ పొందుతుందో తెలియాలంటే రిలీజ్ వరకు వెయిట్ చేయాల్సిందే.
