ఎయిర్ గన్ పేలి చిన్నారి మృతి..
దిశ, జిన్నారం : ప్రమాదవశాత్తు ఎయిర్ గన్ పేలి ఓ చిన్నారి మృతి చెందిన విషాద సంఘటన సంగారెడ్డి జిల్లా జిన్నారం మండలం వావిలాల గ్రామ శివారులోని ఓ ఫామ్ హౌస్‌లో చోటు చేసుకుంది. ఎయిర్ గన్ తో 4 సంవత్సరాల శాన్వి బుధవారం పిల్లలతో ఆడుతుండగా ఎయిర్ గన్ ప్రమాదవశాత్తు పేలడంతో చిన్నారి మృతి చెందింది. మృతి చెందిన పాప తల్లిదండ్రులు నాగరాజు నిజాంబాద్ జిల్లాకు చెందిన వారని పోలీసులు గుర్తించారు. ఉపాధి నిమిత్తం వావిలాల గ్రామంలోని ఫామ్ హౌస్‌లో పని చేస్తున్నారని, అక్కడ కోతులను, కొంగలను భయపెట్టేందుకు ఎయిర్ గన్ వాడుతుంటారని పోలీసులకు తెలిపారు.
స్థానికులు పోలీసులకు సమాచారం అందించడంతో జిన్నారం, గుమ్మడిదల ఎస్సైలు సిద్దిరాములు, విజయ్ కృష్ణ ఫామ్ హౌస్‌ను పరిశీలించారు. చిన్నారి మృతదేహాన్ని ఉస్మానియా ఆస్పత్రికి తరలించి, ఎయిర్ గన్‌ను పోలీసులు స్వాధీనం చేసుకున్నారు. హైదరాబాద్‌కు చెందిన ప్రసాద రావు అనే వ్యక్తికి సంబంధించిన ఫామ్ హౌస్‌ అని పోలీసుల విచారణలో తేలింది. ఫామ్ హౌస్‌లో జరిగిన సంఘటనపై కేసు నమోదు చేసుకొని పోలీసులు దర్యాప్తు చేపట్టారు.
