వరదలో కొట్టుకుపోయిన 'బిర్యానీ భౌగోనా'.. వీడియో వైరల్

దిశ, ఫీచర్స్ : ఇటీవల దేశవ్యాప్తంగా భారీ వర్షాలు కురుస్తున్న సంగతి తెలిసిందే. దీంతో లోతట్టు ప్రాంతాలు మునిగిపోవడం, వాగులు పొంగి నివాస ప్రాంతాల్లోకి వరద చేరడంతో ప్రజలు తీవ్ర ఇబ్బందులు ఎదుర్కొంటున్నారు. అలాగే మరికొన్ని ప్రాంతాల్లో నివాస గృహాలు, కార్లు, మోటార్ సెకిళ్లు తదితర వస్తువులు కొట్టుకుపోతూనే ఉన్నాయి. ఇదిలావుంటే.. తాజాగా కురిసిన వర్షపు నీటిలో బిర్యానీ వండిన భౌగోనా ఒకటి కొట్టుకుపోవడం నెటిజన్లను ఆశ్చర్యానికి గురిచేయగా.. ప్రస్తుతం ఈ వీడియో నెట్టింట వైరల్ అవుతోంది.

హైదరాబాద్ నగరంలో శుక్రవారం కురిసిన భారీ వర్షంతో జనజీవనం స్తంభించి వాహన దారులు తీవ్ర ఇబ్బందులు పడ్డారు. అయితే వీటన్నింటి మధ్య పాతబస్తీలోని ఓ రెస్టారెంట్ నుంచి 'బిర్యానీ భాగోనా' మాత్రం ఎలాంటి ట్రాఫిక్ అడ్డంకులు లేకుండా రొడ్డుమీద పారుతున్న వరదలో కొట్టుకుపోతూ ప్రజలను ఆశ్చర్యపరిచింది. నవాబ్ సాహెబ్ కుంటలోని శాస్త్రిపురం మెయిన్ రోడ్‌లో 'ఆదిబా' హోటల్‌లో ఈ ఘటన జరిగినట్లు తెలుస్తుండగా.. ప్రస్తుతం ఇందుకు సబంధించిన వీడియో ట్విట్టర్‌లో తెగ వైరల్ అవుతోంది. దీంతో ఫన్నీ మీమ్స్‌ క్రియేట్ చేస్తున్న వీక్షకులు.. 'బిర్యానీ ఆర్డర్‌ చేసిన కస్టమర్లు ఈ పూటకు ఉపవాసమే' అని, 'వేగవంతమైన హోమ్ డెలివరీ' అంటూ వీడియోను షేర్ చేశారు.