సాయం కోసం చంద్రబాబు వద్దకు కేసీఆర్.. సీపీఐ నారాయణ సంచలన వ్యాఖ్యలు

దిశ, డైనమిక్ బ్యూరో: తమ ఓటమి ఖరారు కావడంతో టీడీపీ అధినేత చంద్రబాబును కలిసేందుకు సీఎం కేసీఆర్, మంత్రి కేటీఆర్‌లు ప్రయత్నిస్తున్నారని సీపీఐ నారాయణ సంచలన వ్యాఖ్యలు చేశారు. కేసీఆర్ ప్రయత్నాలు చేస్తున్నా అందుకు చంద్రబాబు అంగీకరించలేదన్నారు. మంగళవారం ఖమ్మం జిల్లా రఘునాథపాలెం మండలం బాలపేటలో కాంగ్రెస్ అభ్యర్థి తుమ్మల నాగేశ్వరరావుతో పాటు ఎన్నికల ప్రచారంలో నారాయణ పాల్గొని మాట్లాడారు.

చంద్రబాబు అక్రమ అరెస్ట్ వ్యవహారంలో కేసీఆర్, కేటీఆర్ తీరు చూశామని, అప్పుడేమో అలా మాట్లాడి ఇప్పుడు బాబు మద్దతు కోసం చూస్తున్నారని ఆరోపించారు. ఢిల్లీ లిక్కర్ కుంభకోణం వల్లే బీజేపీకి కేసీఆర్ తలొగ్గారని.. అందరికీ సన్ స్ట్రోక్ ఉంటే.. కేసీఆర్‌కు మాత్రం డాటర్ స్ట్రోక్ ఉందంటూ వ్యాఖ్యానించారు. ఖమ్మంలో తులసి మొక్కకు గంజాయి మొక్కకు పోటీ అంటూ సెటైరికల్ కామెంట్స్ చేశారు. పువ్వాడ అజయ్ గంజాయి మొక్క లాంటి వాడని.. తుమ్మల తులసి మొక్కలాంటి వాడని పేర్కొన్నారు. ఈసారి పువ్వాడకు సీపీఐ పార్టీకి చెందిన ఒక్క ఓటు కూడా పడదన్నారు.