బండికి భలే క్రేజ్.. సీఎం సంజయ్ అంటూ హోరెత్తిన నినాదాలు
దిశ ప్రతినిధి, మేడ్చల్: బీజేపీ స్టేట్ చీఫ్ బండి సంజయ్ కి భలే క్రేజీ పెరిగింది. పేపర్ లీకేజీ కేసులో ఇటీవల జైలుకు వెళ్లి, బెయిలుపై విడుదలైన బండి సంజయ్ శుక్రవారం సికింద్రాబాద్ పరేడ్ గ్రౌండ్ లో నిర్వహించిన ప్రధాని నరేంద్ర మోడీ మీటింగ్ లో పాల్గొన్నారు. సంజయ్ సభ స్థలికి చేరుకోగానే బయట నుంచి ఆయనకు పార్టీ శ్రేణులు ఘన స్వాగతం పలికాయి. దారి పొడువునా సంజయ్ తో సెల్పీలు దిగారు. పరేడ్ మైదానంలోకి రాగానే ఆయనను భుజ స్కందాలపై మోస్తు.. సభ స్తలికి తీసుకెళ్లారు.
సీఎం అంటూ నినాదాలు..
ప్రధాన నరేంద్ర మోడీ సభ ముగిసిన అనంతరం వీవీఐపీ గ్యాలరీ నుంచి బయటకు వస్తున్న సంజయ్ ను కార్యకర్తలు చుట్టుముట్టారు. మరోసారి తన భుజ స్కందాలపై మోస్తూ బయటకు తీసుకొచ్చారు. సీఎం సంజయ్ అంటూ కమల దళం చేసిన నినాదాలు మిన్నంటాయి. తనను దించాలని సంజయ్ కోరినా.. కార్యకర్తలు వినిపించుకోలేదు. బయట వరకు ఎత్తుకొని తీసుకొచ్చారు. కార్యకర్తలు ఇంతటి అభిమానాన్ని చూపించడంతో బండి సంజయ్ కళ్లు చమర్చాయి.
