దిశ ఎఫెక్ట్.. నాలాపై కట్టిన ప్రహరీని కూల్చేసిన అధికారులు..

దిశ‌, గండిపేట్: మ‌ణికొండ మున్సిపాలిటీ ప‌రిధిలో ఇటీవ‌ల నాలాను క‌బ్జా చేసి అక్ర‌మ నిర్మాణాలు చేప‌డుతున్నారంటూ దిశ పత్రిక‌లో ప్ర‌చురిత‌మైన మ‌ణికొండ‌ నాలా క‌బ్జా శీర్షిక‌కు రెవెన్యూ, మున్సిపల్ అధికారులు స్పందించారు. ఈ మేర‌కు సోమ‌వారం అధికారులు చ‌ర్య‌లు చేప‌ట్టారు. మణికొండ మున్సిపాలిటీ ప‌రిధిలోని నెక్నాంపూర్ స‌ర్వే నెంబ‌ర్ 44 లోని నాలా క‌బ్జాకు గురైన స్థ‌లంలో నిర్మాణాల‌ను అధికారులు కూల్చివేశారు. ఈ సందర్భంగా అధికారులు మాట్లాడుతూ... ప్రభుత్వ స్థలాలను అలాగే నాళాలపై నిర్మాణాలను చేస్తే ఇకపై ఉపేక్షించేది లేదని స్పష్టం చేశారు. ప్రభుత్వ స్థలాలు నాళాలపై నిర్మాణాలు చేపడితే వారిపై క్రిమినల్ కేసులు నమోదు చేస్తామని హెచ్చరించారు. ప్రభుత్వ స్థలాల కబ్జాలపై ఇకపై కఠినంగా వ్యవహరిస్తామని వారు తెలిపారు. స్థానికులు ఈ మేర‌కు దిశ ప‌త్రిక‌ను అభినందించారు.