కదిలించిన కథనం : అమరుడికి గుర్తింపు..
దిశ, పరిగి : 'అమరుడికి అవమానం' అనే శీర్షికన 'దిశ' దినపత్రిలో శుక్రవారం వచ్చిన కథనానికి శనివారం పోలీసు శాఖ స్పంధించింది. పరిగి మండలం సుల్తాన్ పూర్ గ్రామంలోని ఎర్ర వాపుల విజయభాస్కర్ రెడ్డి గ్రేహాండ్స్ సీనియర్ కమాండో ఇంటికి శనివారం పరిగి ఎస్సై పి.విఠల్ రెడ్డి కదిలి వెళ్లారు. అనంతరం విజయభాస్కర్ రెడ్డి తల్రిదండ్రులు ఎర్ర వాపుల సుశీలమ్మ–సాయిరెడ్డిలతో కాసేపు ముచ్చటించారు. అనంతరం హైహే 163 రోడ్డు సుల్తాన్ పూర్ గేటు వద్ద గల గ్రేహాండ్స్ సీనియర్ కమాండో అమర జావాన్ ఎర్రవాపుల విజయభాస్కర్ రెడ్డి విగ్రహం వద్దకు ఎస్సై పి.విఠల్ రెడ్డి తన సిబ్బంది, విజయభాస్కర్ తల్లిదండ్రులతో కలిసి వెళ్లారు.
మొదటగా అమర వీరుడు విజయభాస్కర్ రెడ్డి విగ్రహానికి పరిగి ఎస్సై పి. విఠల్ రెడ్డి పూల మాలవేసి సెల్యూట్ చేసి ఘననివాళి అర్పించారు. అనంతరం అమర జవాన్ తల్రిదండ్రులు సాయి రెడ్డి–సుశీలమ్మను శాలువా, పూలమాలలతో సత్కరించారు. మీ కొడుకు దేశం కోసం పోరాడి చరిత్రలో అమర వీరుడుగా నిలిచాడంటూ ఎస్సై పి. విఠల్ రెడ్డి వారికి సూచించారు. ఈ ఘననివాళి కార్యక్రమంలో కానిస్టేబుల్ యాదోజీ, రాజు, జయవర్ధన్, శివ కుమార్, సి.సాయిరెడ్డి, జె.వెంకటయ్య, గోవర్ధన్ రెడ్డి, గొల్ల ఆంజనేయులు, గొల్ల నాగేష్ తదితరులు పాల్గొన్నారు. ఈ విషయం తెలుసుకున్న గ్రామస్తులు, సాయిరెడ్డి, సుశీలమ్మ, శ్రీధర్ రెడ్డి దిశ పత్రికలకు, పోలీసులకు కృతజ్ఞతలు తెలియజేశారు.
