ప్రజలు ధైర్యంగా ఉన్నపుడే పోలీసులు సక్సెస్: CP డీఎస్ చౌహాన్

దిశ, తెలంగాణ క్రైం బ్యూరో: కమిషనరేట్ ​పరిధిలో శాంతి భద్రతలను కాపాడటానికి మరింతగా కృషి చేయాలని రాచకొండ కమిషనర్ ​డీ.ఎస్.చౌహాన్ ​సూచించారు. ఆయా కేసుల్లోని నిందితులను పట్టుకోవటంలో సాంకేతిక ఆధారాలతో పాటు సీసీ కెమెరాల ఫుటేజీని ఉపయోగించుకోవాలని చెప్పారు. రాచకొండ కమిషనరేట్‌లో కమిషనర్​చౌహాన్​మంగళవారం డీసీపీ స్థాయి అధికారులతో సమీక్షా సమావేశాన్ని నిర్వహించారు. ఈ సందర్భంగా మాట్లాడుతూ.. తాము భద్రంగా ఉన్నామని ప్రజలు భావించటమే పోలీసులకు పెద్ద ప్రశంస అని చెప్పారు. పాతనేరస్తుల కదలికలపై కన్నేసి పెట్టాలని, అంతర్​రాష్ర్ట ముఠాలపై ప్రత్యేక దృష్టిని సారించాలని సూచించారు. ప్రస్తుతం అమలు చేస్తున్న చర్యల వల్ల నేరాల శాతం గణనీయంగా తగ్గిందన్నారు.

నేరాల దర్యాప్తులో సివిల్, ట్రాఫిక్​పోలీసులతో పాటు అన్ని విభాగాల సిబ్బంది సమన్వయంతో పని చేయాలని చెప్పారు. సరైన నెంబర్​ప్లేట్లు లేకుండా వాహనాలపై తిరుగుతున్న వారిపై కఠిన చర్యలు తీసుకోవాలన్నారు. విధుల్లో ఉత్తమ ప్రతిభ కనబరిచే వారికి రివార్డులు ఇస్తామన్నారు. కమిషనరేట్​పరిధిలో మంజూరైన కొత్త పోలీస్ స్టేషన్లు త్వరలోనే ప్రారంభమవుతాయని చెప్పారు. సమావేశంలో జాయింట్​కమిషనర్​సత్యనారాయణ, మల్కాజిగిరి డీసీపీ జానకి, యాదాద్రి డీసీపీ రాజేశ్​చంద్ర, ఎల్బీనగర్​డీసీపీ సాయిశ్రీ, ఎస్వోటీ డీసీపీలు గిరిధర్, మురళీధర్, క్రైం డీసీపీ మధుకర్ స్వామి, రోడ్​సేఫ్టీ డీసీపీ బాలు, అడ్మిన్​డీసీపీ ఇందిర, అదనపు డీసీపీలు నర్మద, సమీర్​తదితరులు పాల్గొన్నారు.