విద్యుత్ స్తంభాలు నిలిపారు..తీగలు మరిచారు

దిశ, మఠంపల్లి : విద్యుత్ అధికారుల నిర్లక్ష్యంతో ఆ తండా ప్రజలు బిక్కు బిక్కుమంటూ కాలం వెళ్లదీస్తున్నారు. ఎన్ని సార్లు మొర పెట్టుకున్న అధికారుల నుంచి స్పందన లేకపోవడంతో..దిక్కుతోచని స్థితిలో గిరిజనులు కాలం గడుపుతున్నారు. ఈ దీనగాధ మండలంలోని భీమ్లా తండాలో చోటు చేసుకుంది. తండా గిరిజనులు తెలిపిన వివరాల ప్రకారం..ప్రధాన రహదారి పక్కన శిదిలావస్థలో ఉన్న విద్యుత్ స్తంభం పక్కన కొత్తగా స్తంభాన్ని ఏర్పాటు చేశారు. కానీ పాత స్తంభం నుంచి కొత్త స్తంభానికి విద్యుత్ తీగలు ఏర్పాటు చేయకుండా వదిలేశారు. ఆ తీగలు స్తంభం నుంచి చాలా క్రిందకు వేలాడుతుండడంతో..గ్రామస్తులు భయాందోళనలకు గురి అవుతున్నారు. దీంతో లైన్ మెన్ కు తమ గోడు చెప్పుకున్న వారి నుంచి ఎలాంటి స్పందన లేదని తండా వాసులు ఆరోపిస్తున్నారు. ఈ మధ్య కాలంలో కిందికి వచ్చిన విద్యుత్ తీగలతో ముగ్గురు వ్యక్తులు చనిపోయేవారని, ఇప్పటికైనా అధికారులు స్పందించి వెంటనే కొత్తగా ఏర్పాటు చేసిన స్తంభానికి తీగలు ఏర్పాటు చేయాలని తండా ప్రజలు డిమాండ్ చేస్తున్నారు.