కాంగ్రెస్ కు షాకిచ్చిన జడ్పీటీసీ
దిశ, జహీరాబాద్ : కాంగ్రెస్ కు ఝరాసంగం మండల జడ్పీటీసీ సభ్యురాలు వినీల నరేష్ షాకిచ్చారు. బీఆర్ఎస్ లో చేరి ఝరాసంగంలో కోలుకోలేని దెబ్బ తీశారు. జడ్పీటీసీ సభ్యురాలు వినీల నరేష్ లకు పార్టీ కండువా కప్పి మంత్రి ఆరోగ్య ఆర్థిక శాఖ హరీష్ రావు పార్టీలో చేర్చుకున్నారు. మంగళవారం రాత్రి మంత్రి హరీష్ రావు సమక్షంలో బీఆర్ఎస్ పార్టీలో చేరారు. ఝరాసంగం మండల కాంగ్రెస్ పార్టీ జడ్పీటీసీ సభ్యురాలు వినీల నరేష్ బుధవారం పార్టీ కార్యాలయంలో ఎమ్మెల్యేతో పాటు పలువురు నేతలను మర్యాదపూర్వకంగా కలిశారు.
స్థానిక నేతలు వారిని సాదరంగా ఆహ్వానించి శుభాకాంక్షలు తెలిపారు. ఆహ్వానించిన వారిలో ఎమ్మెల్యే కొనింటీ మాణిక్ రావు , టీఎస్ ఐడీసీ చైర్మన్ మొహమ్మద్ తన్వీర్ , జహీరాబాద్ ఎలక్షన్ ఇంఛార్జి దేవీప్రసాద్ , డీసీఎంఎస్ చైర్మన్ మల్కాపురం శివకుమార్ తదితర నాయకులున్నారు. ఈ సందర్భంగా ఎమ్మెల్యే వారికి శాలువాతో సన్మానించి స్వాగతం పలికారు. ఇదిలా ఉండగా బీఆర్ఎస్ పార్టీలో మాల సామాజిక వర్గానికి చెందిన బలమైన ప్రతినిధిగా వినీల నరేష్ లకు ప్రాధాన్యత దక్కవచ్చన్న అభిప్రాయం వ్యక్తమవుతోంది.
