షార్ట్ సర్క్యూట్ తో ఇల్లు దగ్ధం

దిశ,అల్లాదుర్గం : అల్లాదుర్గం మండలంలోని చిల్వర్ గ్రామానికి చెందిన ఎర్రోళ్ల నాగయ్య ఇంట్లో గురువారం సాయంత్రం షార్ట్ సర్క్యూట్ తో అగ్నిప్రమాదం చోటు చేసుకుంది. స్థానికులు గమనించి అగ్నిమాపక సిబ్బందికి సమాచారం అందించారు. వారు ఫైర్ ఇంజన్ తో గ్రామానికి చేరుకునే లోపే ఇంట్లో ఉన్న నగదు తో పాటు నిత్యావసర సరుకులు మంటల్లో ఆహుతి అయినట్లు స్థానికులు తెలిపారు. అనంతరం అగ్నిమాపక సిబ్బంది మంటలను అదుపు చేశారు. ఇంటి యజమాని నాగయ్య మేకలు మేపేందుకు పొద్దున్నే వెళ్లి సాయంత్రం వచ్చి చూసేసరికి ఇల్లు పూర్తిగా కాలిపోయింది. ఇంట్లో ఎవరూ లేకపోవడంతో ప్రమాదం తప్పింది. బాధితుడికి లక్ష రూపాయల వరకు ఆస్తి నష్టం వాటిల్లిందని ఆయన తెలిపారు. ప్రభుత్వం నష్టపరిహారం చెల్లించి ఆదుకోవాలని ఆయన అధికారులను కోరారు.