అన్ని నియోజకవర్గాల్లో బీజేపీ పాగా వేస్తుంది

దిశ ప్రతినిధి, మహబూబ్ నగర్: అన్ని నియోజకవర్గాల్లో భారతీయ జనతా పార్టీ పాగా వేస్తుందని, అభివృద్ధి అంటే ఏమిటో మేము చేసి చూపిస్తామని మహబూబ్ నగర్ పార్లమెంట్ బీజేపీ అభ్యర్థి డీకే అరుణ అన్నారు. స్థానిక బీజేపీ పార్టీ కార్యాలయంలో గురువారం నిర్వహించిన మీడియా సమావేశంలో ఆమె మాట్లాడారు. కాంగ్రెస్ పార్టీ ఆరు గ్యారెంటీల అమలులో అట్టర్ ఫ్లాప్ అయ్యిందని, అర గ్యారంటీ కూడా అమలు చేయలేక చతికిలబడ్డదని ఆమె ఎద్దేవా చేశారు. మెయిన్ రోడ్లలోని పట్టణ ప్రాంతాల్లో తిరిగే ఆర్టీసీ బస్సుల్లో మాత్రమే మహిళలు ఉచితంగా ప్రయాణిస్తున్నారని, మారుమూల గ్రామీణ ప్రాంతాల్లో బస్సులు లేని పరిస్థితులు కల్పించి, మహిళలను మోసం చేశారని ఆమె ఆరోపించారు.

ప్రతి గృహిణికీ ప్రతినెల రూ. 2500 అందిస్తామని, రూ. 500లకే గ్యాస్ సిలిండర్లను ఇస్తామని, రూ. 200 యూనిట్లు వరకు ఫ్రీ కరెంటు ఇస్తామని ప్రజలను కాంగ్రెస్ పార్టీ మోసం చేసిందని ఆమె ధ్వజమెత్తారు. అంతేకాక ప్రతి నిరుద్యోగికి రూ. 4 వేల నిరుద్యోగ భృతి చెల్లిస్తామని చెప్పి నిరుద్యోగులను మోసం చేశారని, డిసెంబర్ 9 న రైతులకు రుణాలు మాఫీ చేస్తామని, రైతు బంధు రూ. 15 వేలు ఇస్తామని, కౌలు రైతులకు రూ. 12 వేల రైతు బంధు అమలు పరుస్తామని రైతులందరినీ కాంగ్రెస్ పార్టీ మోసం చేసిందని ఆమె మండిపడ్డారు. మోసపూరిత అబద్ధపు హామీలతో తెలంగాణ ప్రజలను మభ్యపెట్టి కాంగ్రెస్ పార్టీ అధికారంలోకి వచ్చిందని ఆమె ధ్వజమెత్తారు. గత పార్లమెంట్ ఎన్నికల్లో తాను స్వల్ప మెజారిటీతో ఓటమి పాలు అయ్యానని, ఈసారి తనను ప్రజలు ఆశీర్వదించి, తప్పక గెలిపిస్తారని ఆమె ధీమా వ్యక్తం చేశారు.ఈ సందర్భంగా తనకు టికెట్ ఇచ్చిన బీజేపీ అగ్రనేతలకు ఆమె కృతజ్ఞతలు తెలిపారు. ఈ సమావేశంలో రాష్ట్ర నాయకుడు ఏపీ మిథున్ రెడ్డి, జిల్లా అధ్యక్షుడు పి.శ్రీనివాస్ రెడ్డి, పడకులు బాలరాజ్, అంజయ్య, లక్ష్మీదేవి తదితరులు పాల్గొన్నారు.