షార్ట్ సర్క్యూట్‌తో మహిళ సజీవ దహనం
దిశ,మిడ్జిల్ :షార్ట్ సర్క్యూట్ తో ఓ మహిళ సజీవ దహనమైంది. కొత్త సంవత్సరం రోజునే ఈ ఘటన జరగడంతో ఆ ఇంట్లో తీవ్ర విషాదాన్ని నింపింది.ఈ ఘటన మిడ్జిల్ మండల కేంద్రంలో బుధవారం తెల్లవారుజామున జరిగింది. స్థానికులు,కుటుంబ సభ్యుల వివరాల ప్రకారం ..మిడ్జిల్ మండల కేంద్రానికి చెందిన తుపుడ యాదమ్మ (55) కూతురు నాగమ్మతో కలిసి గత కొన్ని సంవత్సరాలుగా రేకుల ఇంట్లోనే నివాసం ఉంటుంది. కూతురు నాగమ్మకు ఆరోగ్యం బాగలేక గత రెండు రోజులుగా పక్కనే ఉన్న తమ్ముడు తిరుపతయ్య ఇంట్లో ఉంది. దీంతో రేకుల ఇంట్లో ఒంటరిగా ఉంటున్న యాదమ్మ మంగళవారం అర్ధరాత్రి దాటాక తల దగ్గరే ఉన్న స్విచ్ బోర్డులో షార్ట్ సర్క్యూట్ జరిగి మంటలు దుప్పట్లకు అంటుకున్నాయి. దీంతో ఇంట్లో విపరీతంగా మంటలు చెలరేగాయి.గత కొన్ని ఏండ్లుగా మోకాళ్ల నొప్పులతో బాధపడుతున్న యాదమ్మ నిద్రలో తప్పించుకోలేక ఆ మంటల్లో సజీవ దహనమైందని కుటుంబ సభ్యులు వాపోయారు. బుధవారం తెల్లవారుజామున 3 గంటలకు యాదమ్మ ఇంట్లో నుండి పొగలు రావడం చూసిన చుట్టుపక్కల వారు కొడుకు తిరుపతయ్యకు సమాచారం ఇచ్చారు. కొడుకు వెళ్లి మంటలను ఆర్పి చూసేసరికి అప్పటికే పూర్తిగా కాలిపోయి ఉంది.ఈ ఘటనపై కొడుకు తిరుపతయ్య పోలీస్ స్టేషన్లు ఫిర్యాదు చేశాడు. అనంతరం పోస్టుమార్టం నిమిత్తం జడ్చర్ల ప్రభుత్వాసుపత్రికి తరలించారు.ఈ ఘటనపై కేసు నమోదు చేసుకొని దర్యాప్తు చేపడుతున్నట్లు ఎస్ఐ శివ నాగేశ్వర్ నాయుడు తెలిపారు.
