మద్యం మత్తులో యువకుల వీరంగం

దిశ, గద్వాల : బైక్ పై ప్రయాణిస్తున్న యువకులు ముందుగా వెళుతున్న బస్సు దారి ఇవ్వడం లేదని బస్సు డ్రైవర్ పై దాడి చేసిన సంఘటన గద్వాల జిల్లా కేంద్రంలోని డిఎస్పీ ఆఫీస్ సమీపంలో చోటుచేసుకుంది. వివరాల్లోకి వెళితే..కర్నూల్ నుంచి గద్వాలకు వస్తున్న ఆర్టీసీ బస్సు జిల్లా కేంద్రంలోకి ప్రవేశించింది. ఈ క్రమంలో బస్సు వెనకాల బైక్ పై వస్తున్న ఇద్దరు యువకులు బస్సును ఓవర్టేక్ చేసేందుకు ప్రయత్నించారు. రెండు బస్సులు వెనకాల రావడంతో..ముందుకు వెళ్లి సైడ్ ఇచ్చారు. దీంతో యువకులు బస్సును ఆపి డ్రైవర్ పై దాడి చేశారు. యువకుల దాడిలో బస్సు డ్రైవర్ ముఖంపై గాయాలయ్యాయి. దీంతో డ్రైవర్ చెవిలో నుంచి రక్తం కారడంతో జిల్లా ప్రభుత్వ ఆసుపత్రికి తరలించారు. దాడికి చేసిన యువకులు మద్యం మత్తులో ఉన్నారని స్థానికులు తెలిపారు. స్థానికుల సమాచారంతో సంఘటన స్థలానికి గద్వాల పట్టణ ఎస్సై కళ్యాణ్ రావు సిబ్బందితో చేరుకొని యువకులను అదుపులోకి తీసుకున్నారు.