Jadcherla :చిత్రం భళారే విచిత్రం.. చూపరులను విస్మయానికి గురి చేస్తున్న పోస్టర్
దిశ,జడ్చర్ల : జడ్చర్ల పట్టణానికి చెందిన ఓ నూతన గృహ యజమాని తన ఇంటి ముందు భాగాన వేలాడదీసిన పోస్టర్ చూపరులను విస్మయానికి గురిచేస్తుంది. " అప్పు చేసి కడుతున్నా, చూసి ఏడవకండి రా బాబు " అంటూ ఆయన తన ఇంటి ముందు భాగాన వేలాడదీసిన పోస్టర్ బోర్డును చూసి అందరూ నవ్వుకుంటున్నారు.కొత్త ఇల్లు కడితే ఆ ఇంటికి దిష్టి తగలకుండా ఉండేందుకు కోసం దిష్టిబొమ్మలను మాత్రమే కట్టడం ఇంతవరకు చూసిన పట్టణ ప్రజలు ఇప్పుడు జడ్చర్ల పట్టణంలోని 44వ జాతీయ రహదారికి సమీపంలో లక్ష్మీ నరసింహ కాలనీలో నూతనంగా నిర్మించిన ఓ ఇంటికి ఈ విధమైన వ్యాఖ్యలు వ్రాయించి కట్టిన పోస్టర్ ను చూసి విస్తుపోతున్నారు. ఆ పోస్టర్ లో ప్రముఖ హాస్యనటుడు, కమెడియన్ బ్రహ్మానందం ఫోటోను జతపరచడంతో అటుగా వెళ్లిన వారిని ఆ పోస్టర్ బాగా ఆకట్టుకుంటుంది. ఆ పోస్టర్ ను చూసి చూపరులు ఇదేమి చోద్యం అంటూ విరగబడి నవ్వుకుంటున్నారు.
