కేటీఆర్, తలసాని శ్రీనివాస్ యాదవ్ అనుచరులమంటూ వ్యక్తుల హల్ చల్..!
దిశ, మేడ్చల్ టౌన్: మేడ్చల్ మండలం పూడురు గ్రామంలో ఆదివారం తెల్లవారుజామున ఉద్రిక్తత చోటు చేసుకుంది. కేటీఆర్, తలసాని శ్రీనివాస్ యాదవ్ అనుచరులం అంటూ కొంత మంది వ్యక్తులు పూడుర్ గ్రామ పరిధిలోని సర్వే నెంబర్ 6/2, 6/3 లో మూడు ఎకరాల భూమిలో కంటైనర్ రూంతో పాటు బోర్డు పెట్టేందుకు ప్రయత్నం చేశారు. స్థానికంగా పొజిషన్ లో ఉన్న తాళ్ళ దర్శన్ రెడ్డి (యజమాని) భార్య చూసి ప్రశ్నిచడంతో తనపై ధాడి చేసి అసభ్యకరంగా తిడుతూ ఇంటి పైకి దూసుకురావడంతో భర్త దర్శన్ రెడ్డి వెంటనే పోలీసులకు సమాచారం అందించారు. పోలీసులు రంగ ప్రవేశం చేసి వారిని చెదరగొట్టారు.
అనంతరం దర్శన్ రెడ్డి మాట్లాడుతూ కేటీఆర్ అనుచరుడు సిరిసిల్లకి చెందిన రమేష్ యాదవ్, నారాయణ గౌడ్ 150 గుండాలతో వచ్చి తన స్థలాన్ని ఆక్రమించడం తోపాటు తనను బెదిరించారని ఆరోపించారు. వాళ్ళ నుంచి తనకు ప్రాణహాని ఉందని దర్శన్ రెడ్డి చెప్పారు. శ్రీ వినాయక వెంచర్స్ అరవింద్ మాట్లాడుతూ తాము ఎలాంటి కబ్జాకు పాల్పడలేదని లీగల్ గానే భూమిని రిజిస్ట్రేషన్ చేసుకున్నామని చెప్పారు. దీని పై మేడ్చల్ సీఐ రాజశేఖర్ రెడ్డిని వివరణ కోరగా ఇద్దరి పై కౌంటర్ కేసు నమోదు చేసినట్లు తెలిపారు
