చదువుల తల్లికి ఆర్థిక సహాయం.. కేపీఎస్ జీ సోషల్ మీడియా సభ్యుల ఔదార్యం..
దిశ, ఖమ్మం : సూర్యాపేట జిల్లా తుంగతుర్తి మండలం వెంపటి గ్రామానికి చెందిన శిగ గౌతమి ఎంబీబీఎస్ చదువుకు ఆర్థిక సహాయం కోసం అనే వార్త ఈ నెల 5వ తేదీన దిశ దిన పత్రికలో ప్రచురితమైన విషయం పాఠకులకు విదితమే. ఈ కథనం పై ఉమ్మడి ఖమ్మం జిల్లా కేపీఎస్జీ సోషల్ మీడియా గ్రూప్ అడ్మిన్, ఉమ్మడి ఖమ్మం జిల్లా కేపీఎస్జీ 1, 2 గ్రూప్ ద్వారా కొన్ని రోజులుగా విరాళాలను సేకరించారు. ఈ గ్రూప్ లో వ్యాపారస్తులు, రాజకీయ నాయకులు, న్యాయవాదులు, జర్నలిస్ట్, ఎన్ఆర్ఐలు, విద్యాసంస్థలు, విద్యార్థులు, ఇతర రంగాల ప్రముఖులు ఆర్థిక సహాయం అందించారు.
అయితే ఆదివారం చదువుల తల్లి శిగ గౌతమిను ఖమ్మంకి పిలిపించి షాదీఖానలో ఘనంగా సత్కరించారు. ఉమ్మడి ఖమ్మం జిల్లా కేపీఎస్జీ గ్రూప్ ద్వారా సేకరించిన రూ. 1.50 లక్షల ఆర్థిక సహాయాన్ని అందించారు. ఈ విరాళాల కార్యక్రమానికి కోశాధికారులుగా వ్యవహరించిన రెండు గ్రూప్ ల నుండి అప్పారీ లక్ష్మణ్, మొహమ్మద్ ముజీబ్ లకు ప్రత్యేక ధన్యవాదాలు తెలిపారు. ఈ సన్మాన కార్యక్రమానికి 38 వ డివిజన్ మాజీ కార్పొరేటర్ షౌకత్ ఆలీ, ప్రముఖ వైద్యుడు ఆరిఫ్, మాజీ షాది ఖానా డైరెక్టర్ సయ్యద్ ఉమర్, ఖాసిం తదితరులు పాల్గొన్నారు.
