బస్టాండ్ లో 12 కేజీల గంజాయి పట్టివేత..
దిశ, వైరా : ఆర్టీసీ బస్సులో అక్రమంగా తరలిస్తున్న గంజాయిని ఎక్సైజ్ స్పెషల్ స్క్వాడ్ సిబ్బంది సోమవారం పట్టుకున్నారు. ఒడిస్సా రాష్ట్రంలో మల్కన్ గిరి నుండి ఒక వ్యక్తి మరో మహిళ కలిసి రెండు బ్యాగుల్లో 12 కేజీల గంజాయిని హైదరాబాదుకు తరలించేందుకు ప్రయత్నించగా ఎక్సైజ్ స్పెషల్స్ స్క్వాడ్ సిబ్బంది గంజాయితో సహా వారిని అదుపులోకి తీసుకున్నారు. ముందుగా మల్కన్ గిరి నుంచి భద్రాచలం బస్టాండ్ వద్దకు వారిరువురు గంజాయితో చేరుకున్నారు.
భద్రాచలం నుంచి హైదరాబాద్ వెళ్లే ఆర్టీసీ బస్సులో రెండు బ్యాగుల్లో సుమారు 12 కేజీల గంజాయిని తరలిస్తుండగా ఎక్సైజ్ స్పెషల్ స్కాడ్ పోలీసులకు పక్కా సమాచారం అందింది. దీంతో నిఘా వేసి వైరా బస్టాండ్ లోకి వచ్చిన ఆర్టీసీ బస్సులో తనిఖీలు నిర్వహించారు. ఈ తనిఖీల్లో రెండు బ్యాగుల్లో ఉన్న గంజాయిని స్పెషల్స్ స్క్రాడ్ సిబ్బంది స్వాధీనం చేసుకున్నారు. పట్టుబడిన గంజాయి విలువ సుమారు రెండు లక్షల రూపాయలు ఉంటుందని అంచనా. గంజాయి తరలిస్తున్న ఇద్దరు వ్యక్తులను ఎక్సైజ్ ఎన్ఫోర్స్మెంట్ అధికారులు విచారిస్తున్నారు.
