భక్తుడికి చుక్కలు చూపించిన వానరం
దిశ, కొండగట్టు : కోతులు చేసే చేష్టలు చూసి కొన్నిసార్లు నవ్వుకుంటే మరికొన్నిసార్లు చిరాకు తెప్పిస్తాయి. మామూలుగా కోతులు చేతిలో ఉన్న తినుబండారాలను ఎత్తుకెళ్తాయనే విషయం తెలిసిందే. అయితే అంజన్న దర్శనానికి కొండగట్టుకు వచ్చిన భక్తుడికి ఓ కోతి చుక్కలు చూపించింది. భక్తుడు చేతిలో ఉన్న చిన్న బ్యాగ్ తో పాటు సెల్ఫోన్ ఎత్తుకెళ్లిన కోతి ఆలయ గోపురం పైన కూర్చుంది.
ఎంత బతిమిలాడినా సెల్ ఫోను, బ్యాగు ఇవ్వకుండా భక్తుడిని ముప్పు తిప్పలు పెట్టింది. చివరకు పులిహోర ప్యాకెట్ ఇవ్వగా అందుకు బదులుగా బ్యాగును వదిలేసింది. కానీ సెల్ ఫోన్ మాత్రం ఇవ్వలేదు. దీంతో ఆ భక్తుడు సెల్ఫోన్ కోసం నానా తంటాలు పడ్డాడు. చివరికి గోపురం పైనే ఫోన్ వదిలిపెట్టిన కోతి అక్కడి నుండి వెళ్లిపోయిన వెంటనే పైకి ఎక్కి సెల్ ఫోన్ తీసుకున్నాడు. అయితే ఇందుకు సంబంధించిన వీడియోలు ప్రస్తుతం నెట్టింట వైరల్ గా మారాయి.
