కొండగట్టులో సస్పెన్స్ థ్రిల్లర్ షూటింగ్..
దిశ, మల్యాల : మండల కేంద్రంలోని కొండగట్టు శ్రీ ఆంజనేయస్వామి సన్నిధిలో బుధవారం ఓ క్రైం సస్పెన్స్ థ్రిల్లర్ సినిమా షూటింగ్ ను చొప్పదండి ఎమ్మెల్యే సుంకె రవిశంకర్ ప్రారంభించారు. జమ్మికుంటకు చెందిన దర్శకుడు గౌతమ్ కృష్ణ, నిర్మాత సతీష్ లు అమ్మ బ్యానర్ లో నిర్మిస్తున్న సస్పెన్స్ థ్రిల్లర్ సినిమా ముహూర్తం కొండగట్టులో చేపట్టగా, ఎమ్మెల్యే క్లాప్ కొట్టి ప్రారంభించారు. ఈ సినిమాలో ఎమ్మెల్యే తనయుడు సుంకె దీక్షిత్ ఏసీపీ క్యారెక్టర్ లో హీరో, హైదరాబాద్ కి చెందిన నవ్యశ్రీనివాస్ హీరోయిన్ గా చేస్తున్నారు. అంతకు ముందు ఎమ్మెల్యే రవిశంకర్ కుటుంబ సభ్యులతో పాటు, సినిమా యూనిట్ సభ్యులoదరూ అంజన్న సన్నిధిలో ప్రత్యేక పూజలు చేశారు.
ఆలయ అర్చకులు వారిని ఆశీర్వదించి, తీర్థప్రసాదం అందజేశారు. అనంతరం ఎమ్మెల్యే సుంకే రవిశంకర్ మాట్లాడుతూ ప్రత్యేక తెలంగాణ ఏర్పడిన నుండి సినిమా రంగానికి ప్రత్యేక ప్రోత్సాహకాలు సీఎం కేసీఆర్ అందిస్తున్నారని ఆయన అన్నారు. చిన్నచిన్న సినిమాలకు మంచి గుర్తింపు వస్తుండడం తెలంగాణ యాస భాష అందర్నీ ఆకట్టుకునే విధంగా వచ్చిన బలగం సినిమా మంచి గుర్తింపు పొందడమే దీనికి నిదర్శనం అని ఆయన తెలిపారు. ఈ కార్యక్రమంలో మిట్టపల్లి సుదర్శన్, జనగాం శ్రీనివాస్, ఆలయ ఏఈవో బుద్ది శ్రీనివాస్, సూపరిండెంట్ సునీల్, మాజీ డైరెక్టర్ కొంక నర్సయ్య తదితరులు పాల్గొన్నారు.
