HCA నుంచి పక్కదారి పడుతున్న ఐపీఎల్ టికెట్లు!
దిశ, డైనమిక్ బ్యూరో: ఉప్పల్ స్టేడియం వద్ద ఐపీఎల్ సీజన్-17 టికెట్లు విక్రయిస్తున్న బ్లాక్ టికెట్ల ముఠాను పోలీసులు అరెస్టు చేశారు. ఐపీఎల్ సీజన్-17 లో భాగంగా ఇవ్వాళ హైదరాబాద్ లోని ఉప్పల్ స్టేడియంలో హైదరాబాద్ వర్సెస్ ముంబై మ్యాచ్ జరుగుతోంది. ఈ నేపథ్యంలోనే మ్యాచ్ ను ప్రత్యక్షంగా చూసేందుకు ఆన్ లైన్ లో టికెట్లు దొరకని అభిమానులు టికెట్ల కోసం ఉప్పల్ స్టేడియం వద్దకు భారీగా చేరుకున్నారు. ఇదే అదునుగా బ్లాక్ టికెట్ల ముఠా దందాకు తెరలేపారు. అప్పటికే నిఘా ఉంచిన పోలీసులు బ్లాక్ లో టికెట్లను విక్రయిస్తున్న ముఠాను పోలీసులు అరెస్టు చేశారు. ఈ టికెట్లు హెచ్‌సీఏ నుంచి పక్కదారి పట్టినట్లు పోలీసులు గుర్తించినట్లు తెలుస్తొంది. కాగా మంగళవారం ఐపీఎల్ మ్యాచ్ భద్రతపై రాచకొండ సీపీ తరుణ్ జోషీ మాట్లాడుతూ.. బ్లాక్ టికెట్ల అమ్మకం దారులకు స్ట్రాంగ్ వార్నింగ్ ఇచ్చారు. బ్లాక్ టికెట్ అమ్మకాలపై నిఘా ఉంచామని, బ్లాకులో అమ్మకాలు జరిపితే కఠినంగా వ్యవహరిస్తామని, వారిపై కేసులు నమోదు చేస్తామని హెచ్చరించారు.
